Sempiri peus, de nou, in Sardigna sa curva de sa pesta acapiada a su coronavirus in sa cida chi andat de su seixi a su 22 de martzu. Po imoi is impestaus dogna centumila abitantis bessint de 1.592 a 1.828, ma, nova bona est unu pagu prus de mancu, cunfroma a sa cida a innantis sa pesada de is impestaus nous, +17,2 contras su 42% de seti dis prima. A ddu fairi sciri, comenti in dogna cida, est su Sotziu Gimbe, chi fait sa cica de cida in cida.

Castienduru is provincias sarda scussa cun su nuuru prus artu in centumila abitantis est cussa de Tatari cun 1.133, chi est su 9,5% in prus de sa cida a innnatis, sighia de cussa aristanesa cun 1.109, su 7,2 in prus. A sighiri agataus sa citadi metropolitana de Casteddu cun 831 (13,4 in prus), su Sud Sardigna cun 684 (su 18,7 in prus) e duncas sa provincia de Nugoro cun 662, aunia, a dogna manera sa percentuali in prus est de averas manna: 121,3% in prus.

Galu in pissu de cussu chi podint essiri is letus intregaus a is malaidus de Covid in is aposentus de is spidalis, su 20,6%, e de pagu a suta cussa de is terapias intensivas, su 9,3%.

Po cantu pertocat is vacinus, su Sotziu Gimbe donat is matessis numurus de s’atra borta: prus o mancu s’otantacincu est sa percentuali de is sardus chi ant fatu dus vacinus, s’1,6% cussa cun feti unu e, invecias, chini dus at fatus totus lompit a s’84,6%. Po imoi est bascia, po mori ca benit fatu feti a genti chi erriscat meda cun atras maladias, su vacinu de cuatru: su 3,2% (sa media italiana bessit a su ses po centu). Is pipius intru de s’idadi chi andat de is cincu a is undixi annus chi ant fatu dus vacinus est de su 40,8%, e a custus tocat a aciungir un’atru 5,4% cun feti unu vacinu fatu.

Is pediatras funt batendu meda po vacinai is pipius poita is impestaus nous funt  massimamenti pipius e piciocheddus.

 

 

24 de martzu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.facebook.com/FondazioneGIMBE/