“Est de paricias dis chi seus biendu maneras de trabagliai, de sa Giunta Regionali, chi no andant beni. Si depiant poderai a s’aministratzioni ordinaria, invecias funt sighendu a nomenai de dogna modu. Totu, craramenti, chena chi is sardus ndi scipant nudda”.
Aici Alissandra Todde, presidenti noa de sa Sardigna, finas chi non uficiali, chistionat de is decisionis e de is deliberas chi sa giunta, ghiada de Christian Solinas, est sighendu a produsiri.
“Est gravi meda – si ligit in dd’unu paperi de sa Todde – chi una giunta chi nd’est bessendu tengiat sa pensada de fairi totu custu chena chi atrus possant fairi nudda. Ant tentu cinc’annus de tempus po spendiri su dinari chi teniant a disponimentu, chena fairi peruna cosa e immoi si spassiant a sistemai is amigus”. “Comenti imbucaus is Regioni, spereus in tempu piticu, eus a donai una mirada a totu cussu chi funt fendu in custas dis, in pissu de sa peddi de is sardus”,
Non si frimat a su paperi, sa Presidenti noa, po si dda pigai cun s’amministratzioni de Solinas e atrus fueddus funt lompius in s’intervista chi at fatu cun “Petrolio”, in Rai Tre: “Sa cosa peus – at nau sa Todde – funt is tres miliardus de eurus chi ant lassau de una parti. Deu, de imprendidora, chi calencunu iat airi lassau in is cascias de s’azienda mia tres miliardus chena ddus fairi girai, ce ddu iari stupau inderetura”.
E ancora, arrespundendu a una pregunta de su giornalista Duliu Gianmaria, in pissu de su tempus chi at a serbiri po biri sa Giunta sua, sa Todde non s’est fata pregai e at nau a craras litaras: “Teneus su pensamentu e sa gana de fairi totu a sa lestra, non comenti cussus chi si ddue agataiant a innantis, chi po cinc’annus funt stetius bradipus”.
A suta de ludu is partidus funt giai trabagliendu po fairi nasciri coidendu sa Giunta. A fairi meglius de is tempus passaus non at essi dificili meda, bastat a arregodai in cantu tempus fut stetia fata sa giunta de Solinas…
Màuru Mura
Giobia, su seti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.vdj.it/elezioni-in-sardegna-alessandra-todde-prima-donna-presidente-della-giunta-regionale/
