Donald Trump cun Vladimir Putin s’ant atobiai, sa dì de mesaustu, in sa basi militari de Elmendorf-Richardson, chi s’agatat a prus o mancu dexi chilometrus de Anchorage. Po is aprontadoris de s’atobiu difati feti sa basi militari teniat totu is calidadis de seguresa giai po Trump e giai po Putin. Est finas de nai sa Domu Arva teniat sa spera de non s’atobiai in dd’una basi militari de is Stadus Unidus.
In su mentris Volodymir Zelensky, ca timit chi Putin e Trump lompant a un’acordiu passendu in pissu de sa conca sua, torrat a nai ca no at cambiau sa pensada sua: “Una cosa est segura: is sordaus ucrainus non si nd’ant andai de su Donbass”.
Atobiendu is giornalistas in sa Domu Arva, in su fratempus, sa portabogi Karoline Leavitt at cicau de fairi cumprendiri de non s’aspetai meda: po Trump est una “prova de ascurtu”, at nau, torrendu a nai ca sa spera de Trump est cussa de unu benidori de unu atobiu in tres cun Putin e Zelensky. “Su presidenti de is Stadus Unidus at sempiri nau de cicai sa pagi. Ma custu de mesaustu est un’atobiu feti intru de duas partis. Po lompiri a sa pagi tocat a s’amostai in tres”. Trump, a dogna manera, iat fueddau de “Scambius de territorius” po lompiri a un’acordiu, po custu Zelensky at torrau a nai ca non si movit de is pensadas suas.
Su matessi presidenti de s’Ucraina, chi s’amostat sempiri tostau, in beridadi – sonumancu po cussu chi narant is “media” internatzionalis – iat essi prontu a donai caluncuna terra a sa Russia po lompiri a sa pagi, comenti su matessi Trump pensat, ma pedit chi s’atobiu dongiat garantzias de seguresa po Kiev, arregodadas in is pianus de is alleaus europeus.
Putin at a lompiri in Anchorage, at nau John Bolton chi fut consiglieri de Trump, cun s’idea de fairi torrai Trump a friargiu, candu in sa Domu Arva si funt atumbaus Zelensky e su matessi prsidenti americanu.
Màuru Mura
Martis, su doxi de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://edition.cnn.com/2025/09/08/europe/russia-ukraine-trump-putin-relationships-analysis-intl
