Funt dexi is partidas chi mancant a s’acabbu de su campionau de sa Serie A e ancora, comenti de sempiri in custa ora, nudda est decidiu. Chi in conca parit ca siat una chistioni, massimamenti po su scudetu, intru de Inter, Napoli e Atalanta in coa is scuadras chi gherrant po non ci calai in sa Serie B funt unu pagheddu de prus. Si partit de is 35 puntus de su Torino e is 32 de su Como. Ma, sonumancu chi non facant mancu unu puntu si podit nai ca custas duas scuadras funt giai sarvas. Dapoi, partenduru de s’urtimu postu s’agatat custa situatzioni: Monza a 14 puntus, Venetzia a 19, Empoli a 22, Parma a 24, Lecce a 25, Verona e Casteddu a 26 e Como a 29.
Chi iat essi acabbau immoi su campionau, duncas a ci calai in serie B iant essi su Monza de Nesta, su Venetzia de Di Francesco e s’Empoli de D’Aversa. Ma, ancora, sa scuadra de su Venetzia e de s’Empoli si dda podint gherrai. Difatis, comenti s’amostat, su Venetzia est a cincu puntus de su Parma, chi po immoi est sa scuadra de unu a si sarvai, e s’Empoli feti a dus de su matessi Parma. Est ancora totu de biri e at a serbiri barra, gana e bonasorti. E su Casteddu de Nicola comenti est postu? Funt 26 is puntus in sa classifica e funt cuatru is puntus de is piciocus de Nicola in prus de s’Empoli e non si podit abarrai trancuillus prus de tantis. Bastat una partida perdia, cun is toscanus chi bincint, e cun dd’unu puntu feti de vantagiu non si podit dromiri chena de timiri.
Chi donaus una mirada a is partidas de su Casteddu chi mancant su Casteddu at a giogai, intru de dexi, bieus ca po ses bias at a tocai a moviri foras de Sardigna po atobiai sa Roma, s’Empoli, s’Inter, su Verona, su Como e su Napoli. Partidas dificilis de averas, una prus de s’atra. Ma iat a bastai a binciri is cuatru partidas chi s’ant a gogai in Sardigna, contras de Monza, Fiorentina, Udinese e Venetzia, po si sarvai de sa Serie B. Si podit fairi.
Màuru Mura
Martis, s’undixi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://gianlucadimarzio.com/serie-a-2022-2023-lotta-salvezza-calendario-classifica/
