Mateu Renzi at cumentzau sa carriera politiga in su Partidu Popolari italianu, sighendu dapoi in sa Margherita e in su Partidu Democratigu; de su 2004 a su 2009 at fatu su sindigu de sa provincia de Firenze e in is atrus cinc’annu chi ant sighiu fut su sindigu de sa citadi fiorentina. At fatu su segretariu de su PD de su 2012 e in su 2014 at tentu su cumandu de fairi su presidenti de su Consigliu, pighendu su postu de Erricu Letta. Su guvernu cosa sua est stetiu su cuartu po durada de totu sa Republica Italiana et est abarrau in carriga finas a su mesi de Idas de su 2016, candu at faddiu su referendum costitutzionali de su 4 de su matessi mesi de Idas. In segus c’est stupau de su PD e immoi est su capu de Italia Viva.
Est a nai ca carriera, cun miniscimentus e faddinas, nd’at fatu de averas. Ma non si frimat po nudda, antzis.
Est de custas dis sa nova chi su leader de Italia viva at fatu sciri ca s’at a candidai po is Europeas: “Ndi bogliu pigai is votus a Fortza Italia cun su Partidu Democratigu, sa lista noa at essi decisiva po donai is cartas”. Unu progetu erriciu cun fridumini de s’alleau beciu chi teniat, Carrulu Calenda.
“S’Europa bivit una crisi manna demografica e politiga, dividia intru de s’ideologia e sa burocratzia. Non seus prus su centru de su mundu. Nosi depeus scidai e binciri is cuntierras de su benienti: de s’inteligentzia artificiali a su sociali, de su spatziu a sa sostenibilidadi. E po ddu fairi serbit s’impignu de totus. Deu ci soi. E totu nosu ci poneus sa cara e su coru”, aici Renzi at nau po fairi sciri ca s’at a candidai po is eletzionis europeas de su 9 de làmpadas de su 2024.
Parit unu margiani, ca de politiga, est a nai, s’omini Renzi ndi cumprendit, ma a nosu parit prus unu disisperu.
Funt obertas is scumissas: pagu dinari a chini scumitit in d’una sbruncadura.
Màuru Mura
Giobia su seti de cabudanni de su 2023
Foto: https://www.palermotoday.it/politica/renzi-terrasini-nuovo-partito-il-centro-europee.html
