Su benidori de Joao Pedro fait abarrai frimu su mercau de su Casteddu. Su brasilianu, cun sa Salernitana chi ddu currit, non si movit a decidiri. Poita po su dexi de Ipatinga lassai sa Sardigna non est cosa facili, de fatu otu campionaus de protagonista. Feti una scuadra chi ddu facat bisai aberu ddu at a moviri. E cussu bisu non podit essiri o sa Salernitana o su Monza de Berlusconi.
Funt is chistionis chi su giogadori at fatu sciri a su presidenti de is campanus Iervolino e a su Ds De Sanctis, chi difatis funt pensendu a atru. Joao, perou, non at abarrai a su Casteddu, poita, cun su cuntratu in scadentzia ocannu chi benit, depit cicai de ddu bendiri beni. E immoi ascurtat is campanas chi erribant de sa Germania, Wolfsburg ed Herta Berlino massimamenti, iant essi de acordiu de pigai su giogadori a dexi milionis de eurus.
A una cida de su cumentzu de sa preparatzioni, est ancora totu de decidiri su benidori de un’atru de is giogadoris prus fortis: Nahitan Nandez. S’uruguagiu po s’ora at nau ca nou a su Monza, aunia ant a giogai invecias Cragno cun Carboni, e tenit in conca de giogai feti po una scuadra manna. Su procuradori poderat is cuntatus cun su Napoli, chi a innantis perou depit bendiri Demme, e massimamenti Spalletti depiti biri chi Nandez possat serbiri po su giogu de su Napoli. Abarrant a biri eita sussedit in sa Roma e sa Juventus, chi giai in su mesi de gennargiu passau iat provau a nde ddu pigai.
Po cantu pertocant is giogadoris nous su Casteddu at cuasi pigau s’esternu Di Pardo e su regista Viola. Unu erribat de sa Juventus e s’atru fut sena cuntratu. A centrucampu si sighit a chistionai cun su Monza po Mazzitelli e Valoti e po sa difesa est facili chi lompat un’atru Carboni, de s’Inter. Sighint is chistionis finas po Vigorito, chi iat torrai a Casteddu po fairi su segundu de Radunovic.
27 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018,
