Is carabineris, de una bona pariga de dis, funt sighendu is arrastas de sa femina de Mateu Messina Denaro, a pustis airi agatau condous, viagra e bestiris de femina in sa domu de su boss.

Ma a s’acabbu no ant agatua nudda e in sa caserma de is carabineris de Campobello de Mazara s’est presentada issa, e, inderetura est stetia interrogada de su Ros e de su cumandu provinciali de Trapani.

“Po una pariga de mesis eus tentu una relata, ma non scia chini fut finas a candu non ddu apu bidu in sa televisioni”, at nau.

No est sa sola: sempiri prus genti est presentendusì in is casermas de is carabineris e in is comissariaus de politzia po contai ca issus su boss ddu ant atobiau. Ma chi feti candu ddu ant bidu in is giornalis e in sa televisioni si funt acataus ca cuss’omini, sempiri gentili e de bonas manieras fut su capu de Cosa Nostra.

Totu custus testimongius podint serbiri a is indagadoris, chi funt cichendu de fraigai sa vida chi faiat Messina Denaro: comentis si spostaiat, is abitudinis, chini atobiaiat. Su fini de custa cica est cussa de agatai cussus chi dd’ant agiudau in totu custu tempus.

Calencunu contat de ddu airi bidu in clinica, in Palermu, atrus de airi fatu parti de sa truma de malaidus aunia Messina Denarao faiat sa chemioterapia. Est a nai ca totu custa genti, po s’ora, non funt incurpaus de nudda, ma is indagadoris funt controllendu totu is versionis. Po immoi funt feti in dus is ominis acappiaus po airi agiudau su boss mafiosu: Giuanni Luppino chi ddu acumpangiaiat, in machina, in sa clinica de Palermu e Andria Bonafede, su geometra de Campobello de Mazara, chi at donau s’identidadi sua a Messina Denaro. Indagaus, ma non acapiaus, is figlius de Luppino, Antoni e Pissenti, e su dotori de su boss Arfonsu Tumbarello.

Intru de totu su materiali secuestrau de is carabineris ddue funt finas cincu cartas de identidadi, de seguru umperadas de su boss in sa bandidadura. S’est cichendu de cumprendiri chi funt stetias furadas o apartenint a genti chi ddu at agiudau.

 

 

Màuru Mura

 

 

Lunis, su trinta de gennargiu de su 2023

 

 

Foto: https://www.interris.it/primo-piano/mafia-disposto-il-carcere-per-lautista-di-matteo-messina-denaro/