Unu gol segnau in su segundu tempus, de sa partida perdi apo 6-2 cun su Leeds in Inghilterra, un’atru cuasi giai in su primu tempus, su passagiu po su gol de Lapadula, pressing a is giogadoris chi teniant sa bocia, cursas e ancora cursas chena si frimai mai. In su mentris chi su Casteddu pigaiat gol a cascionis de su Leeds, Zito Luvumbo s’at pigau feti batidus de manus.

S’atacanti angolanu, de bint’annnus in su stadiu Elland Road est stetiu unu grandu protagonista comenti giai iat fatu in totu is partidas amichevolis giogadas finas a tandu. Immoi est unu de is prus chi is tifosus bolint biri in sa prima partida uficiali de sa stagioni chi cumentzat cenarba a sa Unipol Domu ( ateu ta nomini legiu, non si stracaus de ddu nai dogna borta) cun su Perugia. Lompit de sa scuadra is piciocus de su Casteddu e at inderetura allirgau Fabiu Liverani de su cumentzu de is allenamentus e is tifosus, mancu a ddu nai, funt giai amachiendusì po cussu chi podit donai. No at faddiu mancu una partida de totu cussas giogadas de su Casteddu finas a immoi, e bortas meda est partu de averas dificili de poderai. Ma su fubalu de austu est una cosa chi podit spantai, ma immoi tocat a ddu biri contras giogadoris prus prontas e po cussu tocat a abarrai cun is peis beni prantaus in terra. Naraus ca chi sa bona dì si bit de su mengianu giai seus beni postus.

Est unu pei mancosu, ma si dda giogat cun s’atru pei puru, in sa parti drestra ddue currit che unu macu, ma finas in s’ala mancosa scit nai sa sua, chena peruna diferentzia. E in Strasburgo at spantau gioghendu a su centru de s’atacu. Est sempiri in mesu a is peis de is aversarius, ddi pragit a curriri e sempiri in cica de si dda giogai faci apari cun chinechisiat. No est feti lestru poita tenit fortza e abilesa in totu cussu chi cicat de fairi in campu. Ocannu passau, cun sa Primavera casteddaia, at trabagliau meda in sa parti chi prus di mancaiat, cussa de difendiri e immoi giai parit prontu a fairi gosai is tifosus.

 

 

 

Màuru Mura

 

 

 

2 de austu de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.transfermarkt.it/zito-luvumbo/profil/spieler/666547