Funt 1.252 is impestaus nous a su covid-19 in Sardigna, de custus 1.157 besssius a campu cun su tamponi antigenicu. In totu, intru molecolaris e antigenicus, funt 5.019 in tamponis fatus in sa dì passada.
Cincu is mortus in is urtimas oras: un’omini de 83 annus de duas feminas de otanta e norantun’annus de sa provincia de Aristanis, un’omini de otant’annus, chi biviat in sa provincia de su Sud Sardigna e un ‘omini de norantacuatru, chi biviat in sa Citadi Metropolitana de Casteddu.
Is malaidus chi s’agatant in is terapias intensivas funt sempiri su matessi, seti, crescint is chi s’agatant in is atrus aposentus, imoi fu nt centu e segi. In domu funt acorraus in 20.583.
In Italia, invecias, funt 48.456 is impestaus nous, po is numurus chi donat su minister de sa saludi. Sa di a innantis furint stetius 56.386. Is mortus in duas dis funt crescius de coranta a corantacuatru.
Sa percentuali de posividadi passat de su 21,8% a su 24,3%. Funt invecias 227 is chi s’agatant in is terapias intensivas, dus in prus, e in d’una dì feti nd’at imbucau 18. In is atrus aposentus funt passaus a 5.532, chi funt centunoranta in prus.
Po immoi in totu s’Italia ci funt 733.440 impestaus, duncas cuasi trintamila in prus e de candu est cumentzada sa pesta in totu si funt amalaidaus 18.234.242 cun is mortus chi bessint a 168.102.
Parit sempiri acabendu sa pesta, ma is numurus narant ca nou, parit ca s’umperu de is regulas non siant sighias a doveri, ma a castiai sa tassa mesu prena tocat finas e a nai ca, torrendu gratzias a is vacinus, est sempiri prus pagu su numuru de is mortus giovunus. Donai sempiri atentzioni, ma cun passientzia eis a biri ca totu at andai sempiri meglius. Certu ca dus annus aici ant mudau totu cussu chi faiat, ma s’allirghia parit ca non acabit e tandu unu pagu de fidi tocat a dd’amostai nosu puru. Fortza e coragiu.
27 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.repubblica.it/salute/2022/06/21/news/long_covid_con_omicron_il_rischio_si_riduce_del_58-354779162/
