Su Casteddu tzerriat, po sa partida de dominigu chi benit cun s’Inter chi podit balliri a abarrai in Serie A, totu is tifosus. Chi is piciocus de Agostini perdint sa partida e sa Salernitana bincit cun s’Empoli, a pensai mali, iant essi giai in serie B, ma finas castienduru beni totu sa situatzioni si ant agatai cun d’unu pei e e mesu in Serie B feti chi sa Salernitana bincit e su Casteddu ndi leat unu puntu a is interistas.

Tocat a fairi puntus contras una scuadra chi est ancora in gherra po binciri su scudetu, e po custu c’at abbisongiu de totu s’agiudu de is tifosus. In pagus fueddus sa Domus (ti arrori de nomini po unu campu de fubalu) depit essiri pintada feti de orrubiu e de asulu.

Po totu custu sa sociedadi de su Casteddu at promoviu pretzius specialis. De eriseru si podint pigai is biglietus e po primus ddu podint fairi chini tenit su “mini-abbonamentu” o unu billetu de is partidas giogadas contras su Sassuolo o su Verona. Custus is pretzius: quindixi eurus po sa Curva Nord e sa Sud, trinta po is Distinti e corantacincu po sa Tribuna in cunfroma a is pretzius chi iant essi de cincuanta, centu e centucincuanta. De cenarba 13 a is dexi de mengianu cumentzat su compuru po totu is atru, e finas a candu ata a acabbai abarrant is matessiss pretzius. Ativa finas una promotzioni po is piciocus cun prus pagu de 18 annus, chi ant a podiri comporai unu billetu cun feti dexi eurus po totu is setoris de su stadiu.

A is tifosus de s’Inter aberrant feti is moddicas: is cuatruxentus postus acanta a sa Curva Sud.

Partida dificili po caridadi, nemus ddu negat, ma sa bocia est tunda e in totu is annus s’est bidu ca Davidi podit binciri cun Golia, nemus s’arregodat de cussu chi fut sussediu in su 1987 cun cussu Roma-Lecce chi est ancora in is ogus, in is intragnas e in sa conca de is romanistas?

 

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.repubblica.it/sport/calcio/serie-a/cagliari/2020/02/14/news/cagliari_banditi_a_vita_tifosi_razzismo-248595238/