Sa partida cun s’Udinese de su mesi de idas passau, forsis de cussas giogadas finas a imoi est stetia sa peus de su Casteddu in custu campionau chi, pariat pesendusindi, invecias est abarrau legiu coemnti de tandu. In cussa partida, in s’atobiu cun is giorronalistas, Capozucca iat fatu sciri ca is primus a ci bessiri iant essi stetius Godin e Caceres. Giai de sa partida in segus si fut bistu unu Casteddu cun prus gana e barra chi in otu partidas ce dda iat fata a si pigai cuindixi puntus in otu partidas giogadas.
Imoi funt lompias cuatru partidas perdias una in fatu de s’atra, tempus legiu chi at bidu sa peus sempiri cun s’Udinese cun d’unu 5-1 chi lassat pagu de nai de domingu passau. E sa chi erribat no est una de cussas partidas facilis chi podint fairi bisai is tifosus: erribat in Casteddu sa Juventus de s’allenadori beciu de su Casteddu Massimilianu Allegri, inchieta po comenti at perdiu dominigu passau cun s’Inter. Facili chi cussas cuatru sigant finas a erribai a cincu.
Una bona nova est lompia s’atra dì de Verona aunia s’Hellas at bintu cun su Genoa, torrendu gratzias a Choito Simeone. Agiudu mannu cussu de su Verona poita lassat a goa, sempiri de tres puntus su Genoa. Ma imoi tocat a torrai a si dda giogai comenti a su cumentzu de ocannu, mancant andora seti partidas e totus depint donai cussu chi tenint in conca e in is cambas. Mazzarri no erriscat nudda, ma su diretori sportivu Istevini Capozucca, at bofiu un’arretiru “durcu” giai de cras, su seti de arbili, chi bolit nai una diì a innantis de cussu chi sussedit. Sa partida est de sabudu a merì, duncas no est chi mudit meda.
Calencua cosa at a mudai in sa formatzioni. E non feti poita Grassi est scualificau. Torrant Pavoletti cun Marin chi in Udine funt cun su Covid in pissu. Forsis Altare, ca dominigu at fatu figura legia cun Beto, s’at a setziri in panchina po lassai sa maglia a Carboni. Indenanti cun Joao Pedro su scioberu est intru de Pavoletti o Keita, de seguru non Pereiro.
6 arbili de su 2022
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.stadiosport.it/cagliari-juventus-dove-vederla-tv-diretta-streaming-formazioni-orario-9-4-2022-254149
