Eris a merì est cumentzau su Festival de Sanremo ghiau po sa bia de cincu de Amadeus e is arregulas funt craras: non tocat a fairi meda, chena perdida de tempus e seghendu su fueddai a sa sola de is cumbidaus.
A fairi cumentzai su Festival est s’innu de s’Italia de sa su IV regimentu de is carabineris a cuaddu. Dapoi s’imbucat in sa gara cun Marco Mengoni, s’agiudanti de Amadeus, chi narat: “Mancat pagu e a pustis nudda at essi prus comenti de a innantis candu eus a intendiri is trinta cantzonis noas chi nos ant a mudai sa vida, sonumancu po unu pagheddu. Ant a cumentzai a nos acumpangiai dogna dì e non dd’eus a podiri fairi prus de mancu”. Parint fueddus de importu e presumias, ma est beridadi.
Est bestiu de biancu e nieddu su meri de domu, Amadeus: a innantis si sinnat cun sa grugi e in segus calat a saludai sa pobidda Giuanna e su figliu Josè. “A Sanremo tocat a bolli beni, deu bolgiu beni a custa genti e a custu palcu. In custus cinc’annus apu acabbau dogna agetivu po contai sa cuntentesa de essiri innoi a fairi cumentzai su Festival, ma prus che a totu custa festa chi po cincu dis at a fairi allirgai totu s’Italia”. Po issu, comenti at nau prus de una bia, at essi s’urtima.
Cumentzat sa partida cun is cantantis: oberit sa bravigedda Clara e sighit Sangiovanni. Fiorella Mannoia, famada de tempus meda, si amostat cun dd’unu cuasi bestiri de sposa e scurtza. Sighint totu is atrus.
A spantu torrat a pustis tres annus Ibrahimovic chi brullat cun Amadeus e ddi narat de lassai su Festival e fairi imbucai calencun’atru: “Tui tenis 61 annus, deu 42 e apu acabbau poita apu ascurtau su corpu”.
Intru de una pariga de cantzonis e atras s’amostat finas Fiorello chi ndi sbussat unu manteddu cun is fueddus “Amadeus pensadì libertu, est s’urtimu”. Oi si sighit, aici comenti finas a sabudu chi lompit.
Màuru Mura
Martis, su ses de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.money.it/festival-sanremo-2024-cachet-guadagni-conduttori-ospiti-cantanti
