“Seus innoi po nai ca sighint a si dda pigai cun is indipendentistas e po nosu serbit a ndi bogai dogna cundenna po cicai de andai a innanntis. IS catalanus tenint su diritu de scioberai su benidori insoru e totu depit passai cun d’unu referendum po s’indipendentzia”.

Funt is fueddus chi at nau su presidenti de sa Generalitat catalana, Pere Aragones, erribau in Salighera po donai agiudu a Carles Puigdemont, presidenti de issu de su guvernu regionali de Barcellona, acapiau s’atra dì in s’aeroportu e in segus liberau.

“Seus allirgus ca Carles ce ddu ant bogau de presoni, ma sa libertadi sua no est in totu”, at nau galu Aragones, in d’unu atobiu po is giornalistas aprontau cun su sindigu Conoci e Puigdemont e totu. Aciungendu puru: “Sa libertadi in totu c’at essi, po Pugdemont e totu is atrus chi depint abarrai foras de sa Catalogna e de sa Spagna, feti candu su Guvernu spagnolu dd’at a acabai de donai curpas chi no esistint e s’at a podiri chistionai in pagi e trancuillidadi, comenti at giai pediu su Parlamentu e su Consigliu de s’Europa”.

Aragones at duncas torrau gratzias a sa Sardigna e massimamenti a Salighera, assegurendu ca “in tempus de abisongiu su guvernu catalanu at essi a su cosau de sa citadina”.

At chistionau Puigdemont puru, nendu: “Ap’a sighiri a mi moviri, po mei funt stetias oras de dolu, ma custa volontadi de mi frimai no at a binciri. Sa bataglia po sa libertadi sighit e at a sighiri”.

S’eurodeputau, comenti Aragones, non si nd’est scaresciu de torrai gratzias a Salighera e a sa Sardigna totu, arregodendu ca sa relata intru de sa Catalogna cun Salighera tenit arreiginis fortis chi erribant de seti seculus a imoi: “Bogliu torrai gratzias a sa citadi e a su sindigu, gratzias puru a sa Sardigna e a is presidentis de sa Regioni e de su Consigliu Regionali. Innoi parit de essiri in domu, teneus is matessi ideas de democratzia e de libertadi”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.novalibandiere.it/shop/organizzazioni-e-istituzioni/bandiere-varie/bandiera-estelada-catalogna-indipendente/