De cuatru cidas a immoi su numuru de is impestaus a su Covid-19 sighit a calai in Italia. Unu calu chi, po cussu chi narant is studius de sa “Fondazione Gimbe” in s’urtima cida est unu pagu prus frimu: de su seixi a su bintidus de friargiu is impestaus nous furint 349.122 chi in percentuali bolit nai su 20,6% e mancu. Sa cida a innantis sa percentuali fut, invecias, de su 32%.
In Sardigna, in sa matessi cida de su seixi a su bintidus de friargiu, po is impestaus intru is centumila abitanttis est peus, ca funt 2.202. Ma sa percentuali est prus bascia, su -21,7% chi s’andat a castiai cussa de sa cida a innantis.
Aristanis e totu sa provincia, massimamenti, est cussa cun sa prus arta incidentzia de sa cida in Italia, cun, dogna centumila abitantis, 1.965 impestaus. Su numuru de is atras provincias sardas, in su Sud Sardigna est de 729, in Casteddu 649, in Tatari 596 e in Nugoro 509.
In Italia funt po s’ora cincu is provincias cun su numuru prus mannu de su milli impestaus a sa cida de Covid-19, sempiri po centumila abitantis: a pustis Aristanis sighint Reggio Calabria cun 1.216, Siracusa cun 1.215, Fermo cun 1.022 e Vibo Valentia cun 1.006.
In su mentris est tristu su bulletinu de sa Sardigna de eriseru: doxi mortus e 1.609 impestaus, in pissu de 11.528 tamponis, po una percentuali de su 13,9%.
Funt bintiseti cussus chi s’agatant in sa terapia intensiva e 352 in is atrus aposentus. Calat, de 1.012, su numuru de is incungiaus in domu: imoi funt 34.082.
Is mortus funt: duas feminas de otantadus e otantot’annus e dus ominis de setantatres e norantacuatr’annus chi biviant in su Sud Sardigna; una femina de otantases annus e un’omini de otantacuatru chi biviant in sa citadi metropolitana de Casteddu; una femina de cincuant’annus e dus ominis de setantaseti e otanta de sa provincia de Tatari; dus ominis de otantaseti e noranta’annus de sa provincia de Aristanis e una femina de cincuantacinc’annus de sa provincia de Nugoro.
24 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.fanpage.it/innovazione/scienze/omicron-2-potrebbe-causare-forme-di-covid-piu-gravi-della-variante-sorella/
