S’allenamentu in su mericeddu, cun Pavoletti e Falco galu foras e Mancosu chi est prontu e in segus totus serraus in Asseminello. Ddu ant bofiu ins giogadoris e totu, cussu de abarrai totu paris: “Est lompiu su tempus de ndi tirai a foras sa barra”, narant totu a una bogi.
E de Asseminello fueddat Giuanniluca Lapadula, chi po immoi est su giogadori chi at fatu prus gol, tres. Dus in is urtimas duas partidas.
“Soi carrigu e non m’intendu stracu po nudda”, at nau “su bomber” italu-peruvianu chistionendu cun “Il Cagliari in diretta”. “Seus bofius abarrai totu paris poita connosceus s’importu mannu de sa partida de sabudu chi benit cun su Pisa. Intru de nosu eus chistionau nendunosì de intrai in campu cun malesa e cun famini de binciri. Eis a biri ca at essi aici”. Chi poi sighit a fairi gol comenti in is urtimas duas partidas iat essi fintzas meglius: “M’intendu meglius, est beru, in Bolzano eus tentu prus ocasionis de segnai chi in atras partidas. Seus cunvintus chi custu est su caminu giustu”. Immoi lompit su Pisa, e in segus su campionau si frimmat. Ma Lapadula (comenti finas Luvumbo cun s’Angola) non at a partiri po is duas partidas amichevolis de su Perù: “Est unu scioberu de sa sociedadi. Andai in Natzionali po mei est sempiri unu prageri e un’orgogliu mannu, ma sa sociedadi at pigau custa decisioni poita c’est s’abbisongiu de abarrai totu paris e a mei andat beni aici puru”.
A castiai sa partida de sabudu ddu at essi un’omineddu chi corant’annus a immoi giogaiat cun su Casteddu e cun sa maglia de su Casteddu est diventau Campioni de su Mundu in su 1982 in Spagna: Francu Selvaggi, chi oi tenit sessantanoi annus e torrat in Casteddu de protagonista. Selvaggi at a fairi su giru de campu cun sa maglia numuru noi chi at onorau po tres annus, de su 1979 a su 1982 gioghenduru otantacincu partidas e fendu bintotu gol, a innantis de passai a su Torinu de Bersellini po s’annu 1982-83.
Màuru Mura
Cenarba, s’unidixi de Sant’Andria de su 2022
Foto: https://www.infobae.com/it/2022/03/30/gianluca-lapadula-il-percorso-dal-crepacuore-allamore-incondizionato-per-bambino-in-tempi-di-ripescaggio/
