“Putin at agiudau Trump a binciri is eletzionis e in cambiu s’at pigau s’agiugu americanu po s’invasioni in Ucraina”.
Po su New York Times is cosas funt andadas aici e su Cremlino at scambiau is atacus “hacker” contras de sa Clinton cun sa disponibilidadi de Trump a aprovai is miras de Putin. Su “via libera” a sa missioni Ucraina in cambiu de un’agiudu russu po is presidentzialis de su 2016.
Is protagonistas de custu spantu de “deu ti dongiu e tui mi torras”, funt su presidenti russu Vladimir Putin cun su presidenti beciu de is Stadus Unidus Donald Trump.
Ddu scoviat una cica de su New York Times, chi narat ca “is interferentzias russas in sa politiga a innantis de su tempus de Trump funt de ligiri prus a sa guerra de immoi de cantu si fut cumprendiu prima”.
A ponni un’orrugu in fatu de s’atru, po su Nyt, est de cicai in is paginas de is documentus de su Russiagate de su procuradori Robert Mueller, de sa comissioni intelligence de su Senau, de is udientzias de impeachment de Trump e de is fueddus de cuasi cincuanta personis in Usa e in Ucraina.
Totu nascit sa noti de su 28 de triulas de su 2016, candu Hillary Clinton fut po cuncordai sa nomination dem po sas Domu Arva in Philadelphia: in cussas oras Paul Manafort, presidenti de sa campagna de Trump, erriciat una email de s’amigu russu Konstantin Klimnik, chi boliat un’atobiu urgenti intru is dus. Atobiu chi in segus est stetiu fatu in su Grand Havana Room, unu logu acapiau a su mundu de Trump, in pissu de sa torri de Manhattan de propriedadi de Jared Kushner, su ennuru de Manafort.
Innoi Klimnick ddi at chistionau de su “Piano Mariupo”, chi prevediat in cambiu de sa pagi is fundamentas po una republica autonoma in s’Ucraina ghiada de su presidenti tirau a basciu cun sa fortza Viktor Ianukovich. Trump iat giai fatu cumprendiri de essiri de acordiu e Klimnick dhi iat airi agiudau a fairi andai a innantis cussu pianu. A innantis, perou, depiat binciri. Po custu Manafort ddi faiat biri is sondagius chi amostaiant comenti tocat a fairi po is Stadus chi non funt galu segurus.
Lastima manna chi custu fut un’agenti russu, comenti poi ant scopriu is indagadoris americanus. In is cidas benidoras funt cumentzaus is atacus de is hacker contras sa Clinton e su partidu democratigu, chi in segus est acabbau cun s’eletzioni de Trump.
Pariat una chistioni serrda, invecias, po su gioranli americanu, s’acapiat a sa guerra in Ucraina.
Màuru Mura
Giobia, su 10 de Sant’Andria de su 2022
Foto: https://www.npr.org/2021/02/06/964618301/two-prominent-new-york-times-journalists-depart-over-past-behavior
