Po peruna scuadra de fubal no est facili po nudda andai a giogai in Bergamo cun s’Atalanta e binciri sa partida, chena sunfriri meda. Su Casteddu ce ddat fata pota in sa panchina cosa sua si ddue setzit unu chi de bocia nd’at sempiri cumprendiu. Fut lastima manna a biri chi Mazzarri non ce dda faiat a ndi bogai su Casteddu de is urtimus tres postus. Ma, comenti eus nau atras bortas meda, bastaiat a tenni passientzia. Imoi funt erribendu is puntus e is piciocus de Mazzarri si ddus minescint chena farta. In Bergamo a ddue andai chena dus de is giogadoris prus fortis, Joao Pedro cun Pavoletti, non fut facili. Chini chi siat iat airi prantu po totu sa cida, invecias s’allenadori toscanu at faut calai in campu undixi giogadoris barrosus e cun gana meda se ddi dda giogai. At bintu su Casteddu e nosi parit giustu, finas chi Gaseprini comenti dogna borta candu perdit no est de acordiu.
Custus is fueddus de Walter Mazzarri a pustis sa partida: “Binciri gioghendu finas beni in domu de una scuadra forti comenti s’Atalanta mi fait allirgu meda, ma galu no eus fautu nudda. Deus oi giai pensendu a s’Empoli, at essi un’atra partida e chi non sigheus a giogai comenti seus fendu podeus torrai a palas. De oi depu sighiri a segai is ancas a totu is giogadoris. De sa partida de s’atra dì possu nai ca teniaus a Dalbert e Bellanova chi furint is solus chi podiant fairi calencuna cosa in is alas de su campu. Eus sunfriu in sa prima parti de sa partida, ma in segus nosi dda eus giogada cun conca, gana e barra”.
“Si ddu minescint is giogadoris – sighit a nai Mazzarri – ca funt ascurtendu cussu chi ddis naru. Ci depint creiri de prus in is fueddus mius, ma ant fatu una bella partida de averas.Dogna tanti tocat a tenni giogadoris chi tenint famini e gana de erribai, chi non ddi podis tenni giai prontus tocat a ddus scioberai beni, meglius giovunus cun gana chi non campionis giai erribaus”.
8 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.serieanews.com/2022/02/06/mazzarri-gesto-panchina-gol-pereiro-cagliari-atalanta/
