Presonis sardas prenas cun 2.608 presoneris po 2.583 postus. Est unu pesamentu de significu annu in pissu de annu, cun numurus chi amostant comenti su spantu prus mannu est cussa de is strangius, oi in numuru de 795 presentzias, su 30,48%, contras is 581 de su 2024 chi fut, tandu, su 25,3% de su totu.
A ddu fairi connosciri est Maria Gratzia Caligaris, presidenti de su sotziu “Socialismo Diritti Riforme”, chi at pigau in esamini is numurus de s’Uficiu Statisticas de su Ministeru de sa Giustissia chi funt de su 30 de Sant’Andria de coannu e totu.
“Est finas de nai – narat sa Caligaris – ca is numurus, 374 (su 47%), prus mannus de presoniris s’agatant massimamenti in dus presonis. Funt, difatis, 190 in Casteddu-Uta po 739 presonesis po 561 postus. Prus postu mali su presoni de Tatari-Bancali, aunia funt 184 in pissu de 566 presoneris po 458 postus. Una percentuali ancora prus manna est cussa de Mamone-Onanì cun dd’una presentzia de 192 presoneris po 264 postus a disponimentu (su 58,3%)”.
Po sa presidenti de su sotziu, “in su mentris chi sa Regioni, in totu cussu chi podit fairi, cicat unu caminu po iscansai chi su repartu nou de su 41bis, acabbau de pagu in Casteddu-Uta, si prengiat cun atrus 92 presoneris, su Guvernu, cun su Ministeru de sa Giustissia e su Dap, sighit su progetu po fairi de sa Sardigna una tzerachia po is presonis. A is cuasi otuxentus presoneris andant aciuntus finas is setixentus, in parti totus sicilianus e calabresus, chi s’agatant in Seguresa Manna. Is presoneris sardus, manc’unu a su 41 bis e paghissimus in Seguressa Manna, funt pagu de prus de milli e cun custu si cumprendit ca sa delicuentzia sarda est un’atra cosa cunfroma a mafia, ndrancheta et stidda”.
“Non si ndi podit prus, tocat a fairi calenunca cosa po giumpai custu disacatu e tocat chi sa politiga, totu, si dongiat a eita fairi”.
Màuru Mura
