Su guvernu, ghiau de Màriu Draghi, est prontu a ndi tirai s’obrigu de si poderai sa mascherina in is logus a s’obertu, giai de s’undixi de friargiu chi benit, e finas chena castiai su colori de is regionis. Ma non feti custu: atra novas bonas est ca si cumentzat a chistionai de torrai a oberri is discotecas e ca is stadius de su fubal e de is atrus sport podint essiri prenus de prus de imoi.

Totu custu a pustis chi is impestamentus, de sa varianti Omicron, funt calendu apetotu, finas chi is mortus de dogna dì in totu s’Italia non calant mancu po nudda a suta de is trexentus. Chini ndi scit meda narat ca is mortus in dogna pesta funt s’urtimu numuru chi addurant a calai. Finas in Sardigna arriolat meda su numuru de is mortus, in s’urtimu bulletinu funt dexi: duas feminas de otantadus e norantacuatr’annus chi biviant is sa citadi metropolitana de Casteddu, tres ominis de sessantadus, setantatres e setantot’annus e una femina de norantadus annus de sa provincia de su Sud Sardigna, dus ominis de cincuantaseti e sessantases annus e una femina de setanta chi furint de sa provincia de Tatari e una femina de otantatres annus chi biviat in sa provincia de Tatari.

“Is mortus furint in is spidalis giai de coranta dis e calencunu de dus mesi a imoi”, narat Sergiu Marracini, diretori de su “Presidio ospedaliero” chi unit is tres spidalis Covid de Casteddu. Chi aciungit: “Is mortus funt po su numuru prus artu totu chena vacinu o cun feti parti de is vacinus fatus”.

In su fratempus, sa Sardigna aspetat chi totu torrit comenti a innantis, massimamenti po su turismu. Chini trabagliat in custu setori castiat cun fidi manna s’erribu de Pasca Manna, e medas de is albergus funt prontus a torrai a oberri a sa genti, italianus o strangius. Si pedint regulas frimas, prus che a totu po su Green Pass e su Guvernu depit giai cumentzai a trabagliai po non faddiri e tenni cosas seguras e non de cumprendiri dognunu a conca sua.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.ilmessaggero.it/mondo/mascherine_restrizioni_quarantena_francia_spagna_germania_gran_bretagna_europa_oggi_5_febbraio_2022-6484892.html