Robertu Burioni arrespundit a Giorgia Meloni chi una pariga de dis a imoi at nau ca a sa figlia non ddi fait su vacinu. “Deu non apa vacinai a Ginevra e ddu nau – aici iat chistionau sa Meloni -. Timu comenti totus fueddant de is vacinus in Italia: est diventendu comenti una religioni. Sa scentzia puru, in pissu de is vacinus po is pipius no est totu de acordiu. Chi, in segus, andaus a castiai is pipius mortus po su Covid nosi acataus ca no esistint”. Cun is giornalistas fut erribada a nai ca “sa possibilidadi po unu piciocheddu de si morri de Covid est sa matessi de morri boddiu de unu lampu”.
Est custu chi at fatu inchietai su virolugu chi at arrespustu a manera sua: “Is mortus in America po lampus, in is annus chi andant de su 2020 a su 2021, funt bintotu, ma de dogna idadi. Is mortus po su Covid, sempiri in America, a suta de is dixiot’annus, funt invecias noixentus.
A sa capa de Fradis de Italia at arrespustu finas su presidenti de su Sotziu Gimbe Ninu Cartabellota: “Sa Meloni est libera de fairi cussu chi bolit cun sa figlia e po sei, ma non si podit permitiri de nai cosas fartzas”.
In su fratempus in Italia, eriseru, is impestaus nous funt 101.864 e is mortus 415. De lunis si ndi funt pesaus de prus de duas bortas is impestaus e de prus de setanta is mortus. Sa percentuali est prus o mancu sa matessi, prus o mancu su 10%.
S’abasciat su numuru, in totu Italia, de sa genti chi intrat in is spidalis: in is terapias intensivas funt in totu 1.376 chi bolint nai ca tra intradas e bessidas funt corantaseti de mancu; in is atrus aposentus calant de 338 e imoi funt 18.337.
De dus annus a oi, ca totu est cumentzau in su mesi de friargiu de su 2020, is impestaus po su Covid funt stetius 11.765.767, numuru spantosu de averas e is mortus 149.512. Imoi, oi comenti de oi, is impestaus funt in totu cuasi dus milionis.
9 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.fanpage.it/attualita/burioni-su-variante-omicron-meno-letale-ma-immensamente-piu-contagiosa-vaccinatevi-e-amen/
