Sa numuru dus de su Parlamentu Europeu, Eva Kaili, in presoni de su 9 de mesi de Idas passau, po mori de s’indagu in pissu de su Qatargate, est suferendu ca est cuasi torturada.
Ddu narant is dus abogaus de sa politiga greca, Mihalis Dimitrakopoulos e André Risopoulos, a s’acabbu de s’udientzia po biri chi Kaili depat abarrai ancora impresonada.
“De mercuris undixi de gennargiu finas a su trexi, Eva Kaili s’est agatada a sa sola po s’ordini de su giuigi istrutori Michel Claise – narant is abogaus –. Po seixi oras fut in d’una tzella de politzia, non in presoni, frida meda. Non ddi ant donau un’atra manta e dd’ant fatu tirai su capotu, sa lugi de s’aposentu sempiri alluta non dd’at fata dromiri, teniat is mestruatzionis, cun sanguni meda perdiu, e non dd’ant fata samunai. Custa est tortura, pagu de eita fairi”.
“Eva Kaili est incurpada, ma finas a candu non dda cundennant est innocenti. Seus in Europa – aciungint is abogaus – e totu custu andat contras de sa Conventzioni europea de is diritus de s’omini. Non seus torraus a coa de mill’annus, non seus in su ‘Medioevo’. Sa spera est chi su processu siat giustu”.
Non bastat custu: sa Kaili in ses cidas de presonia “at tentu sa possibilidadi de biri sa figlia, chi at lompiu bintitres mesis de vida, feti po duas bortas. Po nosu totu custu est unu sciolloriu de macus”.
Duncas, a pustis, pedint: “sa bessida de presoni po Eva Kaili, cun atras mesuras chi podit essiri su bracialetu eletronicu o atru”.
In su mentrissa politzia economica finantziaria de sa Gdf de milanu e sa politzia giuditziaria de is Pampas Grogas ant acapiau, po ordini sempiri de su giuigi Michel Claise, Monica Rossana Bellini, “consulenti” de sa familia de Antonio Panzeri, chi est stetiu eurodeputau, po associatzioni a delincuere, riciclagiu e corrutzioni.
Bellini, chi at lompiu is cincuantacinc’annus, tenit su studio in Opera e tenit incarrigus medas in aziendas municipalizadas comenti Milano sport, Afol e Sogemi, dd’ant impresonada in Santu Vitore, ma, a pustis, su giugi Robertu Arnaldi at decidiu de dda impresonai in domu sua. Immoi aspetat s’udientzia de acabbu de gennargiu, indenanti a sa Corte d’Appello de Milanu, po connosciri su distinu: at essi cunsignada a su Belgio? Eus benni a biri…
Màuru Mura
Cenarba, su binti de gennargiu de su 2023
Foto: https://www.ansa.it/sito/notizie/politica/2022/12/10/dalla-tv-alleuroparlamento-chi-e-eva-kaili_571945a5-874b-41ab-8560-85f12a0f0375.html
