De su Brescia a s’Ascoli, passendu a intru de cida po su marigosu de sa partida cun su Bologna in Coppa Italia. Su Casteddu ci torrat a provai, cichendu “de sighiri cun is bonus risurtaus e poita no finas cun su bellu giogu chi eus amostau”, comenti at nau a is giornalistas s’allenadori Fabiu Liverani.
“Perdeus Goldaniga, unu giogadori chi fintzas a immoi at sempiri giogau de su cumentzu e bastat custu po fairi cumprendiri cantu est de importu mannu po nosu”, at nau Liverani. “Ma teneus atrus giogadoris chi de seguru no ant fairi intendiri sa mancantzia, ca teneus una rosa de giogadoris forti”.
Bessit Goldaniga, est beru, ma torrat in mesu de campu Rog: “Fintzas issu est unu giogadori de importu. Deu torru a portai in sa truma feti giogadoris a su 100% e custu bolit nai ca Rog est aici. Oi eus a biri cantu minutus at a podiri giogai”.
Comenti nos at abituau non donat perunu inditziu po sa formatzioni: “Su scioberu benit fatu sempiri po donai ecuilibriu a sa scuadra. Teneus contu puru ca cincu cambius funt importantis, bolit nai ca chini imbucat tenit is matessis possibilidadis de chini partit inderetura”.
“S’Ascoli est una scuadra chi lompit de una vitoria foras de domu cun su Bari, at agatau ecuilibriu mudendu modu de giogai. Lassant spatzius pagus, nosu depeus essiri bravus a non ddus sighiri in sa manera chi bolint, cichendu de fairi sa partida nosta po cumprendiri candu si podit atacai e non si podeus permitiri de ddus torrai a fairi partiri comenti iant a bolli”.
Binticuatru is giogadoris convocaus e a dolumannu at a mancai Mancosu, chi abarrat in domu su apo unu doloreddu a su flessori.
Duncas partint po Ascoli: Radunovic, Aresti, Lolic; Di Pardo, Zappa, Altare, Capradossi, Dossena, Obert, Barreca, Carboni; Nandez, Deiola, Makoumbou, Viola, Rog, Lella, Kourfalidis; Lapadula, Pavoletti, Falco, Luvumbo, Millico, Pereiro.
Màuru Mura
Lunis, su 24 de Santu Gaine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.dazn.com/it-IT/news/serie-b/diretta-ascoli-cagliari-dove-vederla-in-tv-e-live-streaming/1i5kdfca92dnv18yhnzfi1b94a
