Sa partida de dominigu cun su Casteddu s’acostiat e in su Casteddu funt contoniaus totu is giogadoris chi furint in giru cun is natzionalis insoru. Totus, Radunovic, Wieteska, Hatzidiakos, Luvumbo, Makoumbou, Obert, Prati, Oristanio, Nandez e Shomurodov funt a dispositzioni, mancari unu pagu stracus, ma prontus a donai una manu a is atrus cumpangius.
De s’infermeria si prestat atentzioni a comenti istat Mancosu. Su numuru cincu trabagliat in parti cun s’orrestu de sa truma, finas poita at sartau totu sa preparatzioni de su mesi de austu po s’operatzioni a su genugu.
Trabagliu a una parti po Petagna e Sulemana, che depint sanai calencunu doloreddu. Ranieri tenit sa spera de ddus podiri fairi giogai, ma tocat a intendiri eita narat su dotori.
In is dis passadas at chistionau cun is giornalistas Andria Petagna, custus is fueddus sus: “Po mimi su Casteddu est unu scioberu de importu mannu. Sa spera mia est de abarrai innoi po annus meda e giogai aici beni po torrai in natzionali. Mirai, custu est su bisu miu”. “Lompu in d’una sociedadi importanti, storica – at sighiu Petagna – chi in prus rapresentat totu una regioni. Po mei est un’onori a bestiri custa maglia. Apu agatau una truma galana e un’omini spantosu che Ranieri. Apu scioberau Casteddu propriu po custu. A mei pragit meda a giogai cun dus atacantis, no importat chi prus maduru o prus lestru. E innoi de atacantis fortis de averas, pensendu a Pavoletti, Lapadula e Luvumbo, ci funti. Cussu chi m’arrennescit meglius est a giogai palas a sa porta. Ia bolli, perou, fairi calencunu gol in prus, de cussus chi apu sempiri fatu”. “Immoi – at aciuntu – depeus pensai a sa partida de dominigu chi benit cun s’Udinese, sa spera est de ce dda fairi a cuberai de s’infortuniu de Bologna. A pustis mi pongiu a dispositzioni e in segus at essi s’allenadori a decidiri”.
Màuru Mura
Cenarba, su 15 de cabudanni de su 2023
Foto: https://www.tuttomercatoweb.com/serie-a/petagna-ranieri-mi-ha-convinto-con-una-telefonata-paloschi-mi-ha-parlato-benissimo-di-cagliari-1876008
