“A pustis sa serrada de su centru de analis de s’ispidali Giuanni Paulu II de Terranoa, est de oi sa nova de sa serrada de cussu de su Paulu Merlo de La Maddalena”. A denunciai totu custu chi est sussedendu in sa Sanidadi gadduresa est su consiglieri regionali de su Partidu Democratigu Pepi Meloni, chi at postu totu po iscritu in d’una pregunta presentada a sa Regioni Sarda po connosciri eita si bolit fairi po risolviri su problema inderetura e po cicai chi sa cosa non s’arrepitat in su benidori.

“Est de tempus paghissimu la noa – scrit Meloni – chi, po mori de sa ridutzioni de su personali tecnicu, si chistionat chi de seixi si est passau a otu unidadis, chi s’aciungit a sa ridutzioni de unu terzu giai fata a innantis, su centru de analis de Terranoa de su cuindixi de custu mesi non at a podiri prus fairi is cosas comenti si depant, chi non po is urgentzias e po is peus maladaias”.

A totu custu, aciungit Meloni, “s’atra noa fea chi finas su centru de analisi de La Maddalena est serrendu”. Una situatzioni chi, narat su consiglieri regionali, “chi est beridadi, iat essi una sententzia mala po is citadinus maddaleninus chi giai s’intendint un’isula in mesu a un’atra isula e po su pagu dinari postu a curriri po is laboratorius privaus chi podint fairi de sistema sanitariu pubricu”.

Meloni, in s’interrogatzioni, fait presenti chi a is centrus privaus gadduresus, cunventzionaus cun sa mutua, est stetiu donau dinari pagu po dogna abitanti, est a nai su prus basciu de totu sa Sardigna. Dinari giai spaciau, faint sciri in is laboratorius chi s’agatant custrintus a pediri a is citadinus totu su dinari chi serbit po fairi is analis, chena perunu agiudu”.

“Mi est obrigu pediri a s’aministratzioni de centrudrestra, chi de cuasi cuatr’annus cumandat sa Regioni, cali mesuras bogliat pigai po sa sanidadi gadduresa, a pustis airi perdiu tempus a non fairi nudda de cussu chi, invecias, iat annuntziau”.

 

 

Màuru Mura

 

 

Giobia, su ses de Santu Aine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.centroanalisibiologiche.it/