Su Casteddu at torrau a cumentzau a trabbagliai in su Crai Sport Center de Assemini, a pustis chi po tres cidas ddu at fatu foras de sa Sardigna. Acabbau su trabbagliu in Ponte di Legno e una pariga de dis intru de Austria e Germania, is piciocus de Pisacane – dapoi de duas dis de pasu – funt torraus a domu. Cun issus, finas, duas novas: Michael Folorunsho, chi fut lompiu sa cida passada, ma non iat trabbagliau cun s’orrestu de sa truma po mori de sa partida de sabudu a mericeddu cun s’Hannover. E cun su giogadori beciu de su Napoli si ddue agataiat finas Yerry Mina, chi fut torrau in Sardigna de Ponte di Legno. Pitanu Luperto a ddis fairi cumpangia ca, finas cussu, depit trabbagliai po unu corpu a sa camba e po custa arregioni no at giogau sa partida intru de amigus . Sighint a trabbaglia po contu insoru, in prus de custus tres, finas Giuanniluca Gaetano cun Lionardu Pavoletti.
Sabudu a is otu e mesu de merì sa partida de unu de ocannu in sa Unipol Domus. Ant a lompiri in Sardigna is francesus de su Saint-Etienne, chi at a giogai in su nomini de Gigi Riva.
In su mentris, Luca Mazzitelli at essi unu giogadori nou de su Casteddu, mancat pagu. Su giogadori de mesu campu, nasciu in su 1995, lompit in Casteddu de su Como: “Soi alliru e carrigu meda de podiri giogai po su Casteddu”, is fueddus de Mazzittelli a pustis essiri lompiu in Sardigna. “Cu s’allenadori Pisacane nosi seus intendius po telefunu, immoi ddu eus a fairi in Assemini. intru de is giogadoris, connosciu beni meda a Zortea cun Borrelli ca funt cun mimi candu giogaia in Frosinone. Soi cuntentu de ddus torrai a agatai”.
Su giogadori beciu de su Como e de su Frosinone, lompit in Casteddu feti po su campionau de ocannu chi benit, ma su Casteddu chi ddu iat a bolli in totu ddu podit comporai in su mesi de làmpadas de su 2026.
Màuru Mura
Giobia su trintunu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.dazn.com/it-IT/news/altro/chi-e-luca-mazzitelli-carriera-e-caratteristiche-tecniche/g18v4bq181e1mj46ms9ckv60
