De su mesi de friargiu de su 2020 no acabbat sa pesta de su Covid-19 in Italia e in s’orrestu de su mundu, candu parit ca s’est bincendu is numurus nosi torrant a portai a peis in terra.
In Italia, po is numurus chi at donau su ministeru de sa Saludi de eriseru ci funt 23.699 impestaus in prus chi nosi faint allirgai castiendu su numuru de sa di a innanti: 51.208. Is mortus, invecias, sighint a cresciri si passat de setantaseti a centu e cuatru in d’una dì. Ma s’allirghia de s’abbasciamentu si frimat candu si bit ca sa percentuali est prus o mancu sa matessi cosa: de 19,3% a 19,5%.
Si ndi pesat finas su numuru de sa genti chi intrat in is aposentus de is spidalis: in sa terapia intensiva si ddue agatant 426, bintunu in prus est a nai, cun corantatres intradas in is urtimas binticuatr’oras. Cussus chi funt in is atrus aposentus funt 11.081, chi bolit nai centucincuantases in prus de sa dì a innantis
Po s’ora is italianus impestaus de su Coronavirus funt 1.414.382, poita 15.483 funt sanaus. De su cumentzu de sa pandemia si funt ammalaidaus in 20.684.182 e is mortus bessint a 170.979. Is bessius de is spidalis e is sanaus funt 19.098.821, numuru cresciu de 39.496.
In su mentris in Sardigna si contant cuatru mortus in prus e atrus 675 impestaus nous po 1788 tamponis, intru de molecolaris e antigenicus, fatus.
Non mudat su numuru de sa genti chi est in terapia intensiva, treixi, e ndi bessint in dus de is atrus aposentus portenduru aici su numuru a centuotanta.
De fatu chi in 770 ant acabau s’incungiamentu in domu immoi nd’abarrat 39.825.
Is mortus funt una femina de otantaset’annus e dus ominis de setantadus e setantaset’annus de sa Citadi metropolitana de Casteddu e una personi chi biviat in sa provincia de Tatari.
Certu funt numurus prus bascius de ocannu passau e totus futn torraus a fairi sa vida chi faiant a innantis de sa pesta, ma no iat essi bellu a biri numurus piticus chi nos allirghint su coru?
Màuru Mura
26 de triulas de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.efsa.europa.eu/it/news/novel-coronavirus-where-find-information
