Is massajus chi produsint cussu chi sa tera dis permitit funt in guerra. “Nosi intendeus traigius de su Stadu e de sa burocratzia regionali”, narant de Coldiretti Casteddu, chi annuntziat una “Class action”.

“Seus galu aspetendu dinari po, prus o mancu, una cincuantina de milionis po sa sicidadi de su 2017 e po is atrus disastrus chi sa natura nosi at amostau in is annus passaus, ma non beneus mancu ascurtaus e nosi castiant comenti chi siaus massajus de serie B, figlius de unu Deus prus piticu. Is istitutzionis nos ant donau is palas”, narat Giorgio Demurtas, presidenti de Coldiretti Casteddu.

“Nemancu la PAC noa arreconnoscit un’ecoschema chi bagliat po cussu chi nosu produseus e in su fratempus – sighit a nai Coldiretti – intru de dinari postu a curriri e de ponni e preguntas fatas pagaus in manera grai is pretzius de is materias primas chi si pesant”. “Is setoris de s’ortofruta, de is cerealis e serricolo funt setoris chi ant sunfriu meda e in is urtimus bint’annus funt stetius postus a un’ala de su mundu de sa politiga – narat sempiri Demurtas – e bistu ca si est surdus a sa limba de is dossier aunia si spiegant problemas e propostas eus a fairi diversamenti. Sa bregungia de sa sicidadi de su 2017, chi poniat a curriri coranta milionis po agiudai is massaius de custu settori est spantosa e non s’agatant fueddus po ndi chistionai. A pustis cinc’annus – sighit a nai – non c’at peruna giustificatzioni po nemus e non si podint atacai a palas de sa burocratzia comenti sempiri faint. Cinc’annus funt cinc’annus, no est una dì”.

Is morrungius chi lompint de su sartu, cun sa genti chi ddue trabbagliat chi non tenit prus fortzas né fisicas e nemancu de conca: “In cinc’annus ant donau feti parti de cussu dinari impromintiu. Sa curpa est de totu is duas is Giuntas chi eus tentu, cussa de centrumanca, chi at fatu dus pesus duas mesuras, e cussa de centrudrestra chi in cuasi cuatr’annus no at risolviu su problema. Una bregungia manna chi amostat cantu nde ddis frigat de custus setoris”.

 

 

Màuru Mura

 

 

Cenarba, su seti de mesi de talamini de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.campagnamica.it/la-nostra-rete/mercato/mercato-di-campagna-amica-di-cagliari/