In Sardigna, in sa cida chi est andada de su dus de martzu passau finas a s’otu, s’impestu de su Covid est cresciu de su 7,5% cunfroma a sa cida a innantis. Est cussu chi si ligit in sa cica de su sotziu Gimbe chi in donnia si ponit a ligiri is numurus. Su spetu bonu, chi depit donai fidi, spera e coragiu, est ca seus andendu meglius po is impestaus dogna centumila personis.

Po cantu pertocat sa chistioni de is spidalis, abarrant ancora in pissu de sa normalidadi is letus ocupaus in is aposentus, su 20,2%, e in su mentris calant cussus de sa terapia intensiva, chi imoi est de su 9,8%.

Is impestaus nous dogna centumila abitantis funt aici dividius in Sardigna: in sa provincia de Aristanis funt 735 (chi bolit nai su 7% de mancu cunfroma a sa cida a innantis), Tatari 668 (innoi est su 35,7% in prus), Casteddu 518 (su 5% in prus) Sud Sardigna 464 (calant de s’11%), Nugoro 245 (innoi puru calant de s’11,9%).

In su fratempus is numurus de su bulletinu regionali de eris no allirgat a nemus: cincu funt is mortus e 1.632 is impestaus nous. Is tamponis fauts funt 10.120, funt in dixiaseti a s’agatai in is terapias intensivas e 318, invecias, in is atrus aposentus, cincu de mancu cunfroma a sa dì a innantis. S’abasciat finas su numuru de chini est incungiau in domu de 24.083 si passat a 23.488.

Is mortus funt una femina de otantot’annus e un’omini de trintaseti chi biviant in sa citadi metropolitana de Casteddu; duas feminas de sessantacuatru e setantases annus de sa provincia de su Sud Sardigna e un’atru omini de otantacinc’annus chi biviat in sa provincia de Tatari.

Seus de prus de ddus annus cun custa pesta mala, si bit sa lugi, sa vida parit chi siat torrendu a cussa chi fut unu tempus, ma galu s’atentzioni depit abarrai manna, massimamenti po is ominis e is feminas chi funt prus debilis.

 

 

10 de martzu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.inail.it/cs/internet/comunicazione/news-ed-eventi/news/news-denunce-contagi-covid-31-agosto-2021.html