Franciscu Figliuolo promovit sa Sardigna po cussu chi at fatu po vacinai sa genti. Su comissariu po binciri su Covid at nau sa sua fueddendu in s’atobiu, online, “Ad Adiuvandum, un esperimento sociale di medicina preventiva, solidale e di comunità”.

“In pissu de is vacinus sa Sardigna est fendu beni meda – at nau –. Po imoi at tentu arresurtaus bonus de averas, calencunu, a castiai beni, comenti s’orrestu de s’Italia e in calencunu casu, invecias in pissu de sa media de s’orrestu de s’Italia”.

Po su Generali “s’est trabagliau, comenti si depiat, massimamenti in is biddas a tesu de totus, andenu a cicai sa genti prus becia e cun atrus problemas. Oi is numurus nosi donant arregioni poita is percentualis de sa Sardigna in pissu de custa genti funt de averas bonas”. “Duncas – at sighiu a nai Figliuolo – sa spera est chi sa pensada de Ad Adiuvandum sigat a fairi is cosas comenti si depit po sa saludi de totu is citadinus”.

Figliuolo no at perdiu s’ocasione po fueddai de sa bataglia contras de su Covid in totu s’Italia: “Cun corantunu milionis de vacinaus, chi est su 76% de cussus chi in Italia si podint vacinai, eus tentu numurus chi nosi faint allirgai, comenti at finas nau Anthony Fauci, immunologo famau, chi at fueddau de s’Italia comenti de una natzioni de castiai po beni. Su meritu est de unu trabagliu de scuadra, comenti non si fut mai bistu a innantis. Eus postu in mesu is Regionis, is Provincias, su mundu de is volontarius, de is sotzius de sa Grugi orrubiua e de totu cussa genti chi at postu a dispositzioni dogna fortza”.

In su fratempus in Sardigna funt corantadus is impestaus nous e, a dolumannu, finas dus mortus: un’omini de 77 annus e una femina de 94 chi biviant in sa Provincia de su Sud Sardigna.

In sa terapia intensiva s’agatant in 18 e in is atrus aposentus in 188. 3.371 funt, invecias, incungiaus in domu.

Is corantadus impestaus nous funt aici dividius in s’Isula: 14 in sa provincia de Tatai, 16 in cussa de Nugoro, 1 in su Sud Sardigna e 11 in sa citadi metropolitana de Casteddu.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.avvenire.it/attualita/pagine/covid-varianti-rischio-concreto-figliuolo