Funt unu sciasciu mannu de genti a lompiri in Casteddu, cun prus o mancu trintacincu o coranta corrieras, ma finas cun veturas privadas. E lompint de dogna corrunconi de sa Sardigna: est sa genti de Pratobello 24, sa lei de aprontamentu popolari, po sa cali ant essi donadas a su Consigliu Regionali, custu mengianu 210.729 firmas.
“Cussa de oi”, narant is aprontadoris, “est sa festa po serrai su totu chi, po una borta, at postu de acordiu totu is sardus”. E duncas, sa genti non feti at a donai is paperis cun is firmas a su Consigliu Regionali, ma ant a aprontai finas una manifestada manna chi, de is dexi de mengianu, at essi in s’orruga de Roma, indenanti e a ingiriu de su matessi Consigliu Regionali. Sa chistioni: “Sa genti in caminu”, contras de s’eolicu e su fotovoltaicu.
Is paperis ant essi portaus, biora de is undixi e mesu de mengianu, a intru de su Palatzu Regionali de una pariga de personis, sceberaus, de is sotzius de Orgosolo, cun a innanti de totus su sindigu Pascali Mereu, babba mannu de sa lei. E ant essi donadas a is rapresentanis de sa segreteria de su Consigliu Regionali: su presidenti Pieru Cumandini at donau cumandu chi, una borta cunsignadas, bengiant postas in dd’unu aposentu chi si prestat.
A foras de su Consigliu, is ativistas ant a torrai a biviri totu cussu chi est sussediu po custa mobilitatzioni manna de genti, partendu de su firmamentu de su portu de Aristanis, finas a erribai a s’impignu mannu po arregolliri is firmas, in dogan bidda e citadi sarda.
Sa manifestada de custu mengianu at a atobiai fina scussa de is Cobas de sa scola sarda chi, in is cosas chi pedinti, finas cussus sa lota contras de s’eolicu. Donat agiudu finas su paris de is sindacaus sardus. E de arregodai finas a Caterina Murino, chi inderetura at donau sustegnu e de is canalis social chi umperat a giai torrau gratzias a totu is sardus.
Màuru Mura
Mercuris, su dus de mesi de talamini 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.videolina.it/articolo/tg/2024/07/27/orgosolo_ecco_la_legge_pratobello_24_contro_la_speculazione_energ-78-1202738.html
