Una dì de pasu a innantis de is urtimas partidas de sa “pool A” de is mondialis de pallavolo feminili. A pustis sa partida binta, cun suferentzia manna, contras de su Belgio is giogadoras asulas oi si dd’ant a giogai contras de su Kenya, e in segus, invecias, cun is meris de domu de s’Olanda.

Partida cumbatia e chi at fatu batiri a forti su coru de sa genti cussa cun Belgio, massimamenti in is partis de dus e de tres. Cun barra, gana e caratiri is campionas de s’urtimu Europeu ce dd’ant fata a binciri una cuntierra chi balit meda po sa classifica, poita pensendu a su benidori is scuadras chi passant a sa segunda torrada s’ant portai a palas is aresurtaus de su gironi de unu.

Aspetenduru sa partida cun su Kenya, intru is piciocas asulas a chistionai est sa regista de sa scuadra, s’aristanesa Alessia Orro: “Sa partida contras de su Belgio nos at fatu sudai de averas, duncas depeus torrai a pigai is fortzas po giogai in sa manera meglius possibili cun su Kenya. Cunfroma a is partidas cun su Camerun e Porto Rico est stetiu diversu meda ca teniaus indenanti una scuadra forti meda. Su Belgio at difendiu beni e meda e po cicai de fairi puntus eus depiu ponni totu sa barra chi teneus. Possu nai ca su meritu nostu prus mannu est stetiu cussu de non lassai nudda e de non perdiri sa conca candu fustis a suta, eus gherrau in pissu de dogna bocia”.

Orro ddu narat e ddu torrat a nai ca contras de s’Italia “totus donant su centu po centu, seus sa scuadra prus forti e in dogna partida depeus aciungiri sempiri calencuna cosa in prus. Andendu a innantis in su Mondiali ant lompiri partidas sempiri prus dificilis, ma nosu seus prontas a custas, nosi dda boleus giogai contras is scuadras prus fortis e, de non si scaresciri, spassiendusì”.

“Innoi in Arnhem – acabbat de nai – nosi aspetant galu duas partidas. Cun su Kenya depeus donai crobba manna a no abbasciai is mesuras de giogu, invecias cun s’Olanda ndi depeus pesai sa calidadi de giogu, poita tenint una scuadra forti. Sa pensada nosta est a binciri custu gironi cun prus puntus possibilis”.

 

 

 

Màuru Mura

 

 

Lunis, su 26 de cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.fanpage.it/sport/altri-sport/quando-gioca-litalia-ai-mondiali-di-pallavolo-femminile-il-calendario-delle-partite-nel-girone/