Su famau giornali Sole 24 ore at difundiu s’atra dì is arresurtaus de sa cica in pissu de s’indagu de sa calidadi de sa vida in Italia. Is pumus artus ddus tenit sa provincia de Udine, sighia de cussas de Bologna e e de Trento.

Donendu una mirada a sa Sardigna, in sa classifica generali de su bistai beni de sa genti italiana, Casteddu s’agatat a pustis atras bintiduas provincias, ma est a nai ca ocannu passau s’agataiat a pustis dixiaseti, in su mentirs chi is atras provincias funt prus a palas meda. Castiendu beni, difatis, a su postu de norantatres ddu est su Sud Sardigna, sa provincia de Aristanis a su postu de sessantacincu, cussa de Nugoro a su postu de sessantaseti e sa provincia tataresa a su de setantaseti. Est a nai puru ca su Sud Sardigna perdit ses posistzionis, Aristanis ndi godangiat cincu, Nugoro, invecias seti e sa provincia tataresa ndi perdit otu.

Chi si pigant in cunsideru is chistionis, non mancant is spantus: Casteddu, po nai, est in positzioni de cincu, in pissu de centu e seti provincias, po cussu chi pertocat sa setzioni “Afaris e trabagliu” e in cussa de dixiannoi po sa setzioni “Demografia e sociedadi”. Galu: Aristanis spantat in is categorias “Ambienti e servitzius” e “Giustissia e seguresa”, in ambas s’agatat in su podiu comenti de segunda.

Po contras, in sa categoria “Demografia e Sociedadi”, cuatru porvincias sardas in pissu de cincu, funt in is urtimus postus: Tatari est sa de norantacincu, Nugoro sa de centu, Aristanis a su de centu e ses e su Sud Sardigna, de fatu, in sa positizioni de centu e seti.

Torrendu a sa classifica generali, “Finas ocannu – ponit in evidentzia su Sole 24 ore – s’amostat ca sa parti bascia de s’Italia s’agatat sempiri in is positzionis prus bascias, difatis est feti Casteddu chi imbucat in is prima strinta positzionis”. Ma non mancanti s ovas e is curiosidadis, comenti sa torrada de Foggia in s’urtima positzioni comenti de doxi annus a oi. In is urtimas coranta positzionis, invecias, liscinant noi provincias de s’Italia de mesania e de pissu, tres in prus de ocannu passau: in prus de Latina, Frosinone, Imperia, Alessandria cun Rovigo, agataus Grosseto, Viterbo, Rieti e Massa Carrara. Perdint positzionis finas Agrigento, Palermu, Brindisi e Trapani.

 

 

 

Màuru Mura

 

 

Lunis, su cuatru de mesi de Idas de su 2023

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://news-project.eu/news-ed-eventi/2021/articolo-sole24ore/