Is fueddus non si frimant a pagus dis de sa vitoria a is eletzionis poligas de is Fradis d’Italia, e c’est abetu mannu po is nominis chi ant cumandai is ministerus de su guvernu benidori. Fintzas chi si cicat de fairi citiri is bogis chi bessint a foras de is segreterias de is partidus, non s’arrennescit a atacai is problemas cun sa Lega de Mateu Salvini, chi est cussu chi at “perdiu” prus votus de is partidus chi ant bintu. Po cantu pertocant is bogis chi fueddant feti de unu abrigu de foras, amelessau de Salvini chi non ddi donant unu ministeru chi contat, su capu de su Carrociu at nau chena farta: “Cantu sciollorius chi scrieis”.

Fintzas sa Meloni cumbidat a non “creiri a is faulas chi funtiri nenduru” e impromitit una scuadra de guvernu “chi at a allirgai totu is partidus e totu is italianus”, a pustis airi bullau cussas chi at difiniu is “getionis chena ne cabu ne coa de Speranza e cumpangi bella”.

Non iat depiri intrai in sa scuadra de is ministrus Guidu Crosetto, unu de is prus a su costau de sa Meloni, chi at a tenni incarrigus prus mannus. “De su guvernu ndi soi bessiu deu e istu beni aici” at nau issu. E si ndi tirat a foras de su “totoministri” finas su guvernadori leghista de su Friuli Venetzia Giulia, Massimilianu Fedriga.

Abbundant is nominis fintzas po is segreterias de is partidus. Su ministru beciu de atrus guvernus Robertu Maroni iat a bolli su guvernadori de su Venetu Luca Zaia comenti de segretariu de sa Lega. Su presidenti venetu assegurat ca bolit sighiri a pensai feti a sa regioni sua, ma Maroni insistit arregodendu ca sa segreteria de Salvini acabbat ocannu.

In su Partidu Democratigu Erricu Letta at giai nau ca non si bolit torrai a candidai in su cungressu benidori e si fait a innantis sa ministra de su guvernu passau  Paula De Micheli, poita “su Pd non podit prus essiri cussu de unu pagu e unu pagu. Depit chistionai sempiri craramenti”.

De fatu s’agatat su guvernadori de s’Emilia Romagna, Stevini Bonaccini, chi non narat de bolliri curriri po sa segreteria de su partidu ma pedit “unu mudamentu mannu o pensu chi eus abrugiai fintzas su segretariu nou”. Bonaccini puru si chesciat de essiri lompius a is eletzionis chena “pensadas fortis po s’Italia e de no airi tentu alleantzias a s’artesa de sa cuntierra”.

 

 

Màuru Mura

 

 

Cenarba, su 30 de Cabidanni de su 2022

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.ilmessaggero.it/politica/elezioni_2022_simboli_partiti_quali_sono_pd_ramoscello_ulivo-6866601.html