Comenti est andendu sa pesta de su Coronavirus in Italia e in Sardigna? Est de meda, a pustis nd’airi chistionau in donnia, chi non castiaus is numurus.

In Italia, po su bulletinu de su Ministeru de sa Saludi, funt 3.702 is impestaus nous in is urtimas binticuatr’oras, sa dì a innantis funt 2.697. Is mortus funt calaus de setanta a trintatres. Sa percentuali de is impestaus est bessia in d’una dì de su 0,4% a su 0,76%.

Bessit puru su numuru. de corantunu, de cussus chi s’agatant in is spidalis e imoi funt 2.464 e abarrant ogualis, invecias, is chi s’agatant in terapia intensiva: 355.

In totu is impestaus de su Covid, in Italia, funt 73.668, ca funt calaus, sempiri de sa dì a innanti, de 878. De su cumentzu de sa pesta eus tentu 4.725.887 impestaus e 131.688 mortus. Cussus sanaus funt 4.520.531.

In Sardigna, po su bulletinu regionali, funt bintotu is impestaus in s’urtima dì e sa bona nova est ca mancu si nd’at mortu. Cussus chi s’agatant in is terapias intensivas abarrant ogualis de una parigna de dis: undixi. In is atrus aposentus de is spidalis ndi funt intraus atrus dexi e imoi si ddue agatant in cincuantanoi. In cincuantacuatru funt bessius de s’incungiamentu in domu e imoi si ddue agatant in 1.373.

A castiai custus numurus bolit nai ca su vacinu est fendu su doveri chi depit fairi e ca forsis eus imparau a biviri in d’una manera chi non connosciaus, ma tocat sempiri a donai crobba manna e sighiri ancora is regulas chi nosi donant: stesiamentu, samunai is manus cantu prus e mascherina candu nos agataus in medas. Ma castiendu su benidori est a nai ca forsis custa borta ndi seus de averas bessendu, a pustis cuasi dus annus de disisperu. Bastat a si fairi unu giru in totu is citadis e castiai sa cara de sa genti: imoi parint totus prus trancuillus e si bit beni in is ogus sa fidi. A dolu mannu c’est ancora genti chi non cumprendit ca tocat a si vacinai, ma custu est un’atru contu.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.fanpage.it/live/coronavirus-ultime-notizie-21-ottobre-2021/