Su leghista Larentu Fontana est su presidenti de sa Camera nou. A pustis, comenti giai sciant totus, fumadas nieddas, in Palazzo Montecitorio, su votu de cuatru at arregalau a s’Italia su numuru tres, po carriga, de su Stadu. Su numuru chi serbiat fut de 2/3 calau a sa magiorantzia totu, contendu finas is schedas biancas e is nullas.

Posta a un’ala sa pensada de Ricardu Molinari, chi at abarrai a su postu chi teniat giai de caputruma in sa camera, e Giuannicarrulu Giorgetti, chi si narat prontu, a dogna manera de andai in su Mef, “chi mi ddu pedint”, su centrudrestra ce dd’at fata a si ponni un’atra borta totu paris in pissu de su nomni de Fontana, chi est stetiu finas eurodeputau e ministru de sa Familia in su primu guvernu Conte. De totus, Fontana, benit bistu comenti unu de sa parti prus tostada de sa Lega.

Larentu Fontana est de Verona e tenit corantadus annus. Ultraconservatore, traditzionalista e contras de s’aborto (“sa prima curpa de candu bocint is feminas in su mundu, at nau in passau), s’eutanasia (“chi non si rispetat sa vida de candu si nascit finas a sa morti si lompit a machioris), is unionis civilis e a is cojas intru sa genti de su matessi sessu.

Numurus dus de sa Lega e responsabili po is esterus de su 2016, duas bortas in Bruxelles comenti euro deputau, no at mai cua sa fidi catolica e antzis nd’at fatu una bataglia. De sempiri s’est ocupau de politiga: est partiu fendu su consiglieri de circoscritzioni, consiglieri comunali, assessori e vicesindigu de Verona.

De fatu a s’esperientzia in Europa, aunia dividiat sa domu cun Mateu Salvini, in is annus chi andant de su 2018 a su 2019 est diventau ministru po sa Familia (una sola, cussa chi bit omini, femina e figlius), vice presidenti de sa Camera e titolari de is Afaris europeus de su 10 de triulas a su 5 de Cabudanni de su 2019 in su primu Guvernu Conte. Grandu tifosu de su Verona, est laurea in Scientzias politigas, Filosofia e Storia.

 

 

Màuru Mura

 

 

 

Cenarba, su 14 de mesi de ladamini de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

 

Foto: https://www.rainews.it/articoli/2022/10/chi–lorenzo-fontana-8c455c5b-9376-4365-b111-00dd8b5ff7a6.html