A s’interru de Vitoriu Emanueli, mortu sabudu passau in Ginevra a s’idadi de otantaset’annus, at essi sonau s’innu sardu, ddu iat pediu cussu etotu candu s’agataiat ancora in vida. “Hymnu sardu nationale” est unu paris de Giuanni Gonnella cun is fueddus de Vitoriu Angius. Scritu po Carrulu Arbertu de Savoia tenit finas sa traduida in italianu, e pragiat meda a is Savoia chi ddu ant umperau, paris a sa Marcia reali, prus de una bia giai a partiri de su 1937. E, comenti eus giai nau a su cumentzu, su matessi Vitoriu Emanuele in vida iat disigliau de essiri acumpangiau in cresia de custa cantzoni.
A s’interru eus agatai prus de unu arrempili de reis de totu s’Europa: Arbertu de Monacu, sa Domu Imperiali de Francia, is Asburgus, su principi capu de sa Domu Reali de Albania, Jorgi de Russia, Carrulu de Borbone de Napoli, su principi ereditariu de su Portogallo e genti de is domus realis de Spagna, Grecia e Serbia.
Su baulu de Umbertu I, s’urtimu Rei de s’Italia bogau a sonu de corru, at essi posta in terra, comenti s’umperat. Comenti chi fessidi unu Rei custu puru: a ingiriu s’at a agatai sa Guardia de onori de su Pantheon dirigia de su cumandanti Ugo D’Atri. In is primus bancus su figliu Emanueli Filiberto cun sa mama Marina Doria. A foras de sa cresia, invecias, duas televisionis mannas aunia sa genti, chi no at a capiri a intru, at a podiri sighiri sa missa.
Su baulu at a lompiri in cresia a is tres mancu dexi e sa missa at a cumentzai a is tres. Dapoi su corpus de Vitoriu Emanueli at essi interrau a intru de sa Basilica de Superga, cun feti sa genti de sa familia. Cras, noi de friargiu, invecias, de mesudì e mesu finas a is noi oras de merì, in sa cresia de Santu Ubertu, in su aintru de sa Regia de Venaria, in is orus de Torinu, at essi aprontau un’aposentu po chini bolit saludai Vitoriu Emanueli.
Màuru Mura
Giobia, s’otu de friargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Vittorio_Emanuele_di_Savoia_(1937)#/media/File:Victor_Emmanuel_of_Savoie_(0)_(cropped).jpg
