Immoi est uficiali, Carrulu Conti est su diretoi artisticu nou de su Festival de Sanremo. E ddu at finas e a dirigiri de pissu de su palcu.

Po su presentadori toscanu est una torrada a s’Ariston a pustis dex’annus: difatis ddu at presentau in is annus de su 2014, 2015 e 2016. No est feti una torrada ma finas una marrania de importu po cicai de promoviri e ponni in is pumus artus is orientamentus musicalis nous.

“Est giai caglienti su telefoneddu, mi funt lamendu in medas. Mi fait prageri meda: is contus torrant”, brullat Carrulu Conti fueddendu de sa nova.

“Depu torrai a pigai cussu trabbagliu portau a innanti beni in sa filera a innantis de Baglioni e ancora meglius in is urtimus cinc’annus de Amadeus. Sa musica at essi, comenti de sempiri, a su centru de dogna cosa. Sa spera est de fairi unu bellu trabbagliu e de sighiri custa traditzioni spantosa chi ponit is familias indenanti de sa televisioni”, sighit a nai Conti chi fait sciri ca su de unu a ddi scriri est stetiu Fiorello.

“Apu nau ca giai po torrai gratzias a totu sa Rai, de s’aministradori a su ditetori generali finas a passai a chini pulit is logus, a is ‘cameraman’, a is tecnicus. Intendendu custu in pissu de palas non podiat nai ca nou”, aciungit Conti. Chi acabbat da poi cun custus fueddus: “Po is dus annus benientis ap’essi su diretori artisticu, e intendu ca est una manera bella de festai is primus corant’annus in sa Rai, difatis su trabbagliu de unu est de su 1985”.

“De oi si cumentzat a trabbagliai – sighit sempiri Conti – funt cosas medas chi depeus fairi: sa cosa de prus importu funt is regulas, dapoi eus a cumentzai a ascurtai is cantzonis de is nous e in segus cussas de is giai connotus. A pustis totu custu depu cicai de cumprendiri chini at a bessiri cun mei in pissu de palcu e totu is strangius de portai”.

 

 

 

 

Màuru Mura

 

 

 

Mercuris, su bintidus de maju de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.gazzetta.it/tv/22-05-2024/carlo-conti-condurra-il-festival-di-sanremo-2025-l-annuncio-della-rai.shtml