A una cida giusta giusta de is eletzionis de su 25 de cabudanni, Mateu Salvini tzerriat is leghistas in su logu insoru prus connotu, Erricu Letta in Monza, chi est atesu de Pontida mancu coranta chilometrus.
“Deu, Giorgia e Sirviu seus de acordiu in cuasi totu e po cinc’annus eus a cumandai beni e paris”, narat su capu de sa Lega in pissu de palcu, chi sinnat sa torrada de is atobius in sa bergamasca de fatu de dus annus de pesta. S’urtima borta in Pontida su numuru unu de su Carroccio iat lassau, de pagu, su Viminali saludendu su Guvernu. Tres annus a pustis, in su matessi palcu Salvini est prontu a ddue torrai paris a totu su centrudrestra.
“Peruna brulla e nemancu cambiu. Cussu chi est scritu in su programa depit essiri sighiu a sa litara”, torrat a nai. In segus, po fairi unu pagu de scena po is giornalistas, pedit a is ministrus sus e a is governadoris de regioni de ponni sa firma in is ses mesuras prus de importu mannu po su partidu. Un’impignu “a pigai po manu custu Stadu”, firmau indenanti a centumilia militantis.
Is chistionis funt cussas de sempiri po is leghistas: de fairi abbasciai is bulletas de sa lugi a su nucleari, de sa flat tax a su 15% e pagi fiscali a “Quota 41”, de torrai a donai seguresa a sa genti a una giustissia prus giusta.
In pissu de palcu fintzas su presidenti de sa Regioni de sa Sardigna Christian Solinas: “Nosu ci seus po e su Psd’Az sighit s’amistadi cun sa Lega”. Fueddus grais, po s’Autonomia, cussus de su guvernadori de su Veneto Luca Zaia, chi ancora no at fatu perunu passu a innantis de su referendum de su 2014. “Su Capitanu”, ca scit comenti pigai sa genti sua chistionat de un’atra mesura urgenti de pigai: a bogai a foras su dinari po sa Rai de is bulletas de sa lugi,postu de su guvernu Renzi e chi po Salvini balit finas a 1,7 miliardus de eurus. “Si podit fiari, ddu faint atrus centu Stadus, narat e torrat a nai, noranta eurus in prus po unu pensionau o po unu chi non tenit trabagliu, bolit nai a intrai in butega tres bortas in prus a su mesi”.
Màuru Mura
Su 19 de cabudanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://metronews.it/2022/09/18/lega-salvini-a-pontida-tra-bandiere-e-gadget/
