“Seus in su disisperu prus mannu, ma immoi boleus connosciri sa beridadi. Boleus giustitzia e cumprendiri comenti est mortu figliu nostu”.

Non c’istat Sandru Giani, babbu de Mattia, s’atacanti de su Castelfiorentino, de bintises annus, mortu in Careggi a pustis s’essiri intendiu mali in campu in sa partida, de su campionau de Eccellenza, contras de su Lanciotto.

Giani fut in su stadiu cun sa familia e sa sposa de Mattia candu su figliu s’est intendiu mali: “Deu sciu feti ca su dotori in cussu campu non si ddue agataiat. E ca sa prima ambulantza est lompia, chena de dotori, a pustis unu cuartu de ora”.

A innantis chi essit lompia s’ambulatza, sighit Giani, “su massagiadori at cicau de sarvai figliu miu, a pustis est finas calada una spetadora de is spaltus chi trabagliat comenti de infermiera po dd’agiudai. Su defibrilladori ddue fut ma est stetiu umperau feti de su dotori de s’ambulatza de dus, lompia in segus. Si podit morri aici?

S’Asl narat chi s’ambulatza est lompia, in beridadi, in otu minutus e su Lanciotto narat ca is dotoris funt acostau de su campu, comenti cumandat sa Figc.

Mattia Giani iat fatu unu tiru in sa porta, a pustis s’at portau una manu in petorras e est orrutu a terra. Su coru at acabbau de batiri po una pariga de minutus, e fut partu inderetura postu mali. Su de unu a cicai de dd’agiudai est stetiu su massagiadori de sa scuadra sua, in segus est erribadu su 118 po ddu portai in su spidali.

Sa morti de Giani at postu in arriolu e disisperu su mundu de su sport a pagu tempus, chi po fortuna est andau beni, de su contu de Evan N’Dicka, su giogadori de sa Roma chi at tentu problemas in campu in sa partida cun s’Udinese.

Giani fut de Ponte a Egola, in sa provincia de Pisa, e iat intregau una parti de sa vida sua a su fubalu. Dominigu torraiat a giogai a pustis de essiri foras de tempus po mori de s’essiri strupiau mali. Fut cresciu in is scuadras de is giovunus, a innantis de s’Empoli e a pustis de su Pisa.

 

 

 

Màuru Mura

 

 

 

Martis, su seixi de arbili de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.open.online/2024/04/15/firenze-mattia-giani-morto-malore-campo-castelfiorentino/