A una cida de sa morti a norantases annus de sa Reina Elisabeta II, prima dì de pasu po su rei Carrulu III e su principi de su Galles, William, chi candu at a morri su babbu at a diventai rei, chi in custas dis non si funt mai frimaus po totu sa cosa chi depiant fairi.

Su rei, paris a sa Reina noa Camilla, eris, po si pasai, est andau in sa domu de Highgrove in su Gloucestershire ingresu – chi de sempiri ant umperau – po tenni finas dis de pensamentus prus de familia e arregodai a Elisabeta. In su mentris chi su babu fut cun Camilla, William, paris a sa pobidda Kate e is tres figlius (George, Charlotte e Louis) funt andaus in su birdi de Sandringham, in su Norfolk.

Funt custas oras de pasu necessariu po babu e figliu, non feti po cumpartiri sa morti de Elisabeta cun totu su poppulu e is cuatru natzionis de su Regnu Unidu e cumentzai is primus passus po sa sucessioni, ma fintzas po s’aprontai a s’urtimu capitulu po s’adiosu a sa Reina: s’interru de Stadu de lunis 19 in s’abbatzia de Westminster. Elisabeta at essi interrada a su costau de su pobiddu, su principi Filipu, in sa cresiedda de St  George, in su casteddu de Windsor.

Abarrat galu girendu, po contu de totu s’areu, sa principessa Anna, torrada in Iscotzia po is passientzias de is assotzius chi pigant dinari de is Windsor; su principi Edoardu, est lompiu, paris a sa pobidda Sophie, a Manchester.

Est sighia sa bisita de is ingresus, po saludai sa Reina insoru, po totu su noti. De spantu sa genti chi dd’at bofia saludai: prus de cincu chilometrus de genti, chi bolit nai a depiri aspetai a lompiri in denanti de su corpus fina strinta oras de fatu.

In su mentris eris a mengianu su presidenti de sa Republica Sergiu Mattarella, faint sciri de su Cuirinali, “at chistionau cun su rei nou Carrulu III po is passientzias suas e a nomini de totu is italianus”.

 

 

 

Màuru Mura

 

 

Su 16 de cabidanni de su 2022

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.adnkronos.com/addio-a-elisabetta-ii-carlo-e-il-nuovo-re_5RbVxTQskv44eQdI3aRbjZ