Unu mortu italianu in sa gherra intru de sa Russia e s’Ucraina: est Edy Ongaro, nomini de bataglia “Bozambo” de corantases annnus. Bociu de una bomba a manu in su mentris chi cumbaiat cun is separatistas de su Donbass. A ddu fairi sciri a totu s’orrestu de su mundu, cun d’unu post in Facebook, est su Sotziu Stedda Orrubia de su Nordest. A donai bogi a su post finas unu ammigu che fradi, Massimu Pin, chi at avertiu sa familia. Su piciocu venetu, de Portogruaro in sa provincia de Venetzia, fut cicau in Italia de sa politzia po unu cravongiu in d’unu tzilleri. Iat scutu una punta de pei a brenti a su tzilleraiu e, in segus si dda iat pigada finas cun d’unu carabineri. Torrau a ponni in libbertadi de su giuigi, chi at sighiu sa lei, non s’agataiat prus e de issu is novas lompiant feti de is social.
In su Donbass si fut postu cun sa banda Prizrak, bistu in russia comenti un’eroi, paris a atrus “foreign Fighters. Candu Vladimir Putin iat postu sa firma, amostendusì in sa televisioni, po arreconnosciri s’indipendentzia de is republicas de su Donbass, iat scritu in Facebook: “Custa est sa dì nosta”.
“Bozambo” su nomini de bataglia ddu iat scioberau pensendu a unu partigianu de sa Segunda gherra mondiali e a ddu fairi gherrai c’iant pensau – iat sempiri contau – s’arregodu de cussu chi is fascistas iant fatu a sa familia sua.
Ongaro est mortu in su vilagiu deAdveeka, in regioni ammanniada, a làcanas cun su nord. Po cussu chi s’est scipiu s’agataiat in d’una trincea paris a atrus sordaus, candu est lompia una bomba a manu tirada de is nemigus. Si nc’est fuliau a pissu po sarvai sa vida a is atrus.
Su presidenti ucrainu Volodymir Zelensky at amostau unu videu po pediri ancora agiudus poita is russus funt ponendu paris is fosordaus po atacus fortis contras su Donbass e la parti basci de s’Ucraina, finas Mariupol. “Fait parti de sa tatica russa – narat- scieus ca si funt stesiendu de is zonas aunia funt perdendu sordaus meda po si cuncentrai in atras de imortu prus mannus, aunia po nosu est meda dificili”.
Primu de arbili de su 2022
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.adnkronos.com/chi-era-edy-ongaro-litaliano-ucciso-in-donbass_7o7QGixetrqYe0iyBJ6kSb
