“Mateu Mancosu imbucat in sa truma de trabbagliu de s’allenadori Fàbiu Pisacane: a pustis unu caminu a intru de is formatzionis de is giovunus, lompit in sa scuadra de is mannus in calidadi de agiudu tecnicu. Mancosu lassat sa ghia de s’Under 17 chi, de immoi in sus, at essi ghiada de Alessiu Rubinici, chi fu giai s’allenadori de dus de s’Under 20”. Aici si ligit in su giassu de su Casteddu chi augurat, a s’unu e a s’atru, unu bonu trabbagliu.
In su mentris su Casteddu si preparat a sa partida de dominigu chi benit in Pisa. Partida tostada, ma chi is piciocus de Pisacane bolint binciri po ponni su fueddu de acabu, po cussu chi pertocat sa permanentzia in sa Serie A, finas po ocannu chi benit. Su Pisa s’agatat in s’urtimaa positzioni de sa classifica, po immoi at fatu feti cuindixi puntus, chi funt giustu sa metadi de cussus chi tenit sa scuadra de sa capitali sarda.
A pustis sa partida perdia cun su Como, is casteddaius bolint torrai a fairi puntus chi contant e de seguru sa gana de binciri s’at a amostai in s’Arena Garibaldi.
In sa partida, in terra Toscana, non at a giogai Riyad Idrissi chi, sabudu passau, s’est strupiau a su genugu: po su tertzinu sadilesu su campionau est acabbau. Est a nai ca po su matessi infortuniu, su Casteddu at perdiu giai Belotti, in sa partida contras de s’Inter, e dapoi Felici in sa partida de Coppa Italia cun su Napoli.
Chi donaus una mirada a sa classifica, Su Casteddu s’amostat in dd’una positzioni meglius de atras scuadras. Difatis s’agatat a su postu de catodixi, paris a su Genoa de De Rossi e a su Torinu de D’Aversa, a trinta puntus. Est a nai ca tenit ses puntus in prus de sa Cremonese de Davidi Nicola, chi po immoi est sa scuadra de tres chi ci iat calai in Serie B. Ma, su campionau est ancora longu e po cussu sa partida de dominigu, contras de is nieddus-asulus toscanus, est de importu mannu.
Partida chi, a dogna manera, non podit essiri sighia de is tifosus casteddaius chi bivint in s’Isula, ma seus segurus ca is sardus emigraus in totue no ant a fairi mancai sa presentzia insoru.
