Sa Salernitana bincit su recuperu in Udine cun d’unu gol de Verdi a s’acabbu de sa partida e torat in cursa po si sarvai. Imoi is campanus s’agatant sempiri a s’urtimu postu de sa classifica, ma in cumpangia de su Genoa e de su Venetzia, ma depint ancora giogai un’atra partida sartada po su Covid in is mesis passaus.

Sa vitoria de sa Salernitana ponit unu pagu de apretu in prus a su Casteddu, ma is piciocus de Mazzarri tenint su distinu in is manus insoru: funt ses is puntus in prus de is urtimas tres scuadras. S’apretu erribat ca sa partida chi sa Salernitana est de giogai cun su Venetzia e po comenti podit acabbai cussus ses puntus podint diventai feti tres. Salernitana e Venetzia s’ant a giogai meda mercuris chi benit, su 27 de arbili, in Salerno. E su Casteddu depit giogai cun totu e tres is scuadras chi tenit a palas foras de domu.

Ma mancu sa Sampdoria, chi s’agatat a unu puntu in prus de su Casteddu si podit nai ca est foras de is giogus.

Custas funt is urtimas cincu partidas chi s’ant a giogai po si sarvai de sa serie B:

 

Sampdoria (bintinoi puntus): Verona-Sampdoria; Sampdoria-Genoa; Lazio-Sampdoria; Sampdoria-Fiorentina e Inter-Sampdoria.

 

Casteddu (bintotu puntus): Genoa-Casteddu; Casteddu-Verona; Salernitana-Casteddu; Casteddu-Inter; Venetzia-Casteddu.

 

Venetzia: (bintidus puntus): Venetzia-Atalanta; Salernitana-Venetzia; Juventus-Venetzia; Venetzia-Bologna; Roma-Venetzia; Venetzia-Casteddu.

 

Salernitana (bintidus puntus): Salernitana-Fiorentina; Salernitana-Venetzia; Atalanta-Salernintana; Salernitana-Casteddu; Empoli-Salernitana; Salernitana-Udinese.

 

Genoa (bintidus puntus): Genoa-Casteddu; Sampdoria-Genoa; Genoa-Juventus; Napoli-Genoa; Genoa-Bologna.

 

Comenti de sempiri at essi su campu a chistionai, cun sa spera chi arbitrus e Var facant a bonus, chena cogliunai a nemus.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://twitter.com/officialuss1919