“Sa familia e totu su fubalu italianu ant perdiu un’omini mannu. Deu apu perdiu unu fradi, sa spera mia fut unu miraculu”.
Robertu Mancini fueddat de Gianluca Vialli, mortu s’atra dì a cincuantot’annus de idadi po mori de unu cancru a su carrelati. Mancini at giogau una vida paris a Vialli in sa Sampdoria e in dus iant fatu 312 gol, ma is numurus non bastant a contai custus dus.
“Est unu tempus dificili meda, ma depeus cicai de andai a innantis”, narat mancini ca in is dis passadas fut andau a Londra, aunia Vialli s’agataiat in su spidali, po ddu saludai. “nosi seus bidus, eus chistionau e finas brullau. Fut sempiri in bonas e custu unu pagu mi agiudat – contat s’allenadori de sa Natzionali in d’una intervista fata e difundia de sa Figc –. Intru de nosu ddue fut amigantzia, amori e rispetu meda. Luca fut unu chi allirgaiat is corus de totu e aici ddu depeus arregodai”.
“Sa spera mia fut chi sussediat calencuna cosa de spantosu po ddu sanai – sighit Mancini –. Eus biviu cuasi totu sa vida paris, un’acapiu mannu e forti intru de nosu comenti cussu de dus fradis. In su fubalu iaus pigau caminus diferentis, ma candu ses amigu de unu comenti de Luca ddu ses po sempiri”.
At fatu storia s’imbrassu de su 11 de triulas in pissu de s’erba de Wembley a pustis airi bintu is Europeus: Vialli fut giai malaidu, ma si fut postu a dispositzioni po agiudai sa Federatzioni: “Luca at fatu cumprendiri a totus, de prus a is prus giovanus, cantu balit sa maglia de sa Natzionali. Po nosu totus est stetiu unu chi contaiat meda, massimamenti candu fueddaiat a is piciocus e a issus pragiat a ddu ascurtai. Fut totu bellu e contu de importu mannu. Depeus sighiri in custu caminu. Luca fut unu piciocu sempiri allirgu, bortas pagu ddu apu bidu inchietu, andat arregodau aici. Soi seguru ca a issu iat a pragiri a ddu arregodai po custu e finas po essiri stetiu unu giogadori mannu, unu professionista de averas cun d’una autoridadi manna. Fut unu piciocu allirgu, galu giovanu e ddi pragiat sa vida”.
Mancini cun Vialli si furint atobiaus giai in is scuadras de giovunus de s’Italia candu teniant cuindix’annus e apustis cun sa maglia de sa Sampdoria ant amostau a totus cussu chi furint capassus de fairi.
Màuru Mura
Lunis, su noi de gennargiu de su 2023
Foto: https://www.repubblica.it/sport/calcio/2023/01/06/news/gianluca_vialli_morto_nazionale_mancini_sampdoria-379846275/
