Galu machioris po Radja Nainggolan. De fatu essiri stetiu acapiau po airi guidau chentza sa patenti de una pariga de dis a oi, s’Anversa, sa scuadra belga aunia giogat, at cfatu sciri s’atra dì de ddu airi stupau de sa scuadra.

Po mori de ita, bosi seis pregontendu? Ita at airi cumbinau custa borta custu giogadori, chi bortas meda at fatu chistionai prus po cussu chi faiat foras de campu che in su campu etotu? Su giogadori, chi in Italaia at giogau cun Piacenza, Casteddu, Roma e Inter, s’at pipau una sigareta eletronica. Su giogadori de mesu campu fut setziu in panchina cun atrus cumpangius, a pustis airi cumpudau su terrenu de giogu de su stadiu de su Standard Liegi, chi giogaiat cun s’Anversa in d’una partida chi, in segus, at bintu po 3-0.

De fatu chi is giogadoris ant testau su campu si funt setzius in sa panchina, comenti si fait sempiri a innantis de giogai. In cussu momentu Nainggolan nd’at tirau a foras de sa maniga de sa Felpa una sigareta eletronica e ddu ant fotografau in su mentris chi ndi bogaiat de buca una neula de fumu biancu.

“S’Anversa” si ligit in dd’una nota de sa scuadra belga, at chistionau cun su giogadori “in pissu a is cumpurtamentus chi is giogadoris depint tenniri, finas poita totu torrat a sa scuadra e a totu is giogadoris. Su club at decidiu de ci stupai su giogadori, fintzas a pigai atras decisionis, de sa Prima Scuadra. Ant pigau acordius crarus finas de cussu chi sa sociedadi non bolit chi facat su giogadori. Non s’at a chistionai prus de cussu chi est sussediu, aici su giogadori e aici sa sociedadi”, acabbat aici su documentu de s’Anversa.

Radja at scritu calencuna cosa in Instagram torrensu is scusas a sa sociedadi e a is tifosus: “Bosi bogliu nai ca mi dispragit po cussu chi apu fatu. Ddu nau chena perunu problema e chentza i cicai scusas, in cussu momentu non ci fui pensendu”.

 

 

 

Màuru Mura

 

 

 

Cenarba, su 21 de Santu Aine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.fanpage.it/sport/calcio/nainggolan-fuma-prima-della-partita-e-fa-infuriare-lanversa-sospeso-a-tempo-indeterminato/