In Italia funt 17.193 is impestaus nous de su Covid -19 de is urtimas binticuatr’oras, po cussu chi narant de su ministeru de sa Saludi. Sa dì a innantis funt 18.391.

Is mortus intru de is duas dis, invecias funt setantanoi, binti in prus de sa dì prima.

Is tamponis, molecolaris e antigenicus po su coronavirus, sempiri po cussu chi ndi bessit de su ministeru funt 181.055, cuasi setimila de mancu de sa dì a innantis e duncas sa percentuali de impestaus est prus o mancu sa matessi cosa: de su 9,5 a su 9,6.

In is uspidalisi is terapias intensivas si ddue agatant in 226, tres in prsu , tra bessidas e intradas chi funt stestias bintiseti.

In su fratempus in Sardigna funt atrus 745 is impestaus nous a su Covid-19, de custus 616 de tamponis antigenicus. Is tamponis in totu, intru de antigenicus e molecolaris, funt 4611.

Tres is mortus: un’omini de setantaset’annus, chi biviat in sa Citadi metropolitana de Casteddu, una femina de norantacuatr’annus, chi biviat in sa provincia de Aristanis e un’atru de sa provincia de Tatari.

Galu noi is patzientis Covid in is terapias intensivas, e s’abbasciat de bintotu su numuru de is ricoveraus in is atrus aposentus: immoi funt centubintunu.

Acorraus in domu funt 13.736.

Duncas, est a nai, ca is impestaus a su Covid funt abbascendusì in totu Italia, ma sa provincia de Aristanis est cusssa cun sa prus arta incidentzia po sa cida chi andat de su 25 a su 31 de maju passau. Est sempiri su Sotziu Gimbe a fairi custas cicas.

Comenti nau s’atra cida is impestaus calant de 172.883 a 131.977 e is mortus de 656 a 547. S’abbasciat finas su numuru de chini intrat cun calencuna patologia: de 6240 a 5121 e in is terapias intensivas de 286 a 248.

Sempiri castiendu is numurus s’abbasciamentu est in totu is Regionis e si passat de su -7,6% de su Latziu a su 41,4% de su Molise.

 

 

3 de làmpadas de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

https://ambmadrid.esteri.it/ambasciata_madrid/it/ambasciata/news/dall_ambasciata/2020/03/emergenza-covid-19-coronavirus.html