“Eus mudau is pronosticus negativus de chini si creiat ca is Fradis d’Italia si moriat a pustis pagu tempus, pensu chi eus a fairi su matessi po sa durada de su guvernu”.

Giorgia Meloni festat, in Prassa de su Populu in Roma, is dexi annus de sa fundatzioni de su partidu, chistionentu, po sa prima borta, indenanti de sa genti sua, in sa dopia carriga: Presidenti de su Consigliu e Presidenti de su partidu.

Torrat a nai ca est in prenu acordiu cun is alleaus: “Su clima in su Consigliu de is ministrus est cussu chi depit essiri, is alleaus mi funt fendu trabbagliai cun facilidadi meda”. Umperat fueddus tostaus, invecias, candu chistionat de sa manovra finantziaria: “Apu agatau stranas medas is positzionis de calencunu sindacau. Sa Cgil narat ca est una manovra contras is poburus, a pustis – narat a dentis strintus sa Meloni – candu benit a si cunfrommai cun su guvernu difendit su pos e narat ca est discutibili su scioberu de adeguai is pensionis prus piticas prus che cussas artas. Est una cosa chi de unu sindacau de manca non m’aspetaia”.

E non fait mancu unu passu a palas po sa strategia in Europa, antzis, torrat a nai ca po cantu pertocat is migrantis sa linea tostada de su guvernu est paghendu: “S’Italia dd’at acabbada de acetai totu chena narri nudda e at artziau sa conca: s’arresurtau est ca s’at a chistionai, in s’atobiu de friargiu, de su problema. Gratzias a nosu si torrat a fueddai de s’interessu natzionali”.

Difendit finas sa scera de chistionai “cun totus”, finas cun is “leaders” de is “Paesi di Visegrad”: “Seus sempiri prus cunvintus ca esistat un’Europa de Serie A e una de serie B. Custa nosta capassidadi de chistionai cun totu nosi rendit centralis e nosi donit sa possibilidadi de contai de prus”.

“Cussa de dexi annus a immoi est stetia “una scumissa binta gratzias a sa coerentzia”, narat cun orgogliu mannu.

 

 

 

Màuru Mura

 

 

Martis, su 20 de Mesi de Idas de su 2022

 

 

 

Foto: https://www.ilfattoquotidiano.it/2022/12/17/meloni-alla-festa-di-fdi-soddisfatta-della-manovra-e-critica-confindustria-e-sindacati-bizzarra-cgil-che-difende-il-pos/6909330/