A pustis is fueddus contras de su Paba Lioni, Trump si dda pigat finas contras de Giorgia Meloni: “Apu faddiu pensada in pissu de Giorgia Meloni, soi sciocau: creia chi teniat coragiu, invecias non si bolit agiudai contras de s’Iran”, at nau su presidenti de is Stadus Unidus, dapoi chi sa Presidenti de su Consigliu at difendiu a su Paba. “Fueddus chi non si podint intendiri”, at decrarau sa Meloni. “Est issa chi non si podit intendiri – at arrespustu su presidenti americanu – poita non dd’interessat chi s’Iran tengait un’arma nucleari chi iat fairi sartai in aria s’Italia in dus minutus de arrelogiu”.

A pustis sa cuntierra cun Trump, sa Meloni at erriciu sa solidariedadi de sa parti manna de su Partidu democratigu, cun sa segretaria Elly Schlein chi in s’aposentu de sa Camera at nau, cun fortza manna: “Innoi seus totu aversarius politigus, ma seus totus citadinus italianus e non acetaus atacus o amelessus de guvernus strangius”. Est finas de nai chi sa presidenti Meloni at atobiai su presidenti de s’Ucraina Zelensky in palatzu Chigi.

Intantis po is Stadus Unidus e s’Iran s’acostiat un’atru atobiu po cicai de lompiri a sa pagi. “Podit sussediri intru de is duas dis benientis, ma seus pensendu a un’atru logu chi non siat su Pakistan”, at nau Trump chi at assegurau ca “sa guerra est cuasi acabbada”. Po cussu chi narat su Wall Street Journal funt otu is petrolieras acapiadas a s ‘Iran custrintas de is americanus a torrai a coa de su 13 de arbili, est a nai de candu est imbucau su frimamentu de is navis de Washington in su Strintorgiu. Totu si petrolieras no ant fatu resistentzia.

Est una cursa contras de su tempus po agatai una manera de no umperai prus armas. E si fait intendiri finas sa Cina cun cuatru puntus po sa pagi. Putin at a lompiri in Pechino aintru de su mesi de làmpadas, fait sciri Lavrov. In su fratempus sa presidenti de s’Italia at decidiu de ponni a un’ala is acordius cun Israele: si nd’at a chistionai comenti scadit.

 

 

 

 

 

Foto: https://www.lastampa.it/esteri/2026/04/14/news/trump_contro_giorgia_meloni_difesa_papa-15584673/