Est sempiri prus bataglia intru po su torneu de Wimbledon e sa Federtennis ingresa a pustis sa decisioni de non fairi giogai in s’erba ingresa (chi ant essi de su bintiseti de lampadas a su dexi de triulas) is tennistas russus e bielorussus. Sa cosa at fatu inchietai totus. Chi s’Atp e sa Wta ant inderetura chistionau de sciollorius, finas Novak Djokovic at nau sa sua in cussu chi est sussedendu in Ucraina. Su numuru unu de su tennis a su mundu at nau ca “est una cosa de macus”. “Deu soi unu figliu de sa guerra e apa sempiri cosa de nai contras de sa guerra etotu – at nau Djokovic –. Soi cresciu e pesau in su mentris chi si ndi sciusciaiat sa Jugoslavia e cumprendu beni cussu chi est sussedendu in su coru de totus. Giai ddu scieus totus cussu chi est sussediu in Serbia in su 1999, non depu essiri de ua dd’arregodai. Ma c’est una cosa de nai: is sportivus non c’intrant nudda cun sa guerra. Candu sa politiga si ponit in mesu cun su sport no est una cosa de bonu”.
De su matessi parrer un’atra tennista de atrus tempus, nascia in Cecoslovachia ma imoi americana, Martina Navratilova: “Non creu chi siat sa cosa giusta de fairi. Finas, chi est a nai, is ucrainus tengiant arregioni. A ci bogai is tennista russus e bielurussus no est de fairi”.
Barazzuti puru, tennista italianu famau in is annus setanta e otanta at pigau fueddu: “Su torneu de Wimbledon est bidu in totu su mundu, duncas si podint tenni totu is arregionis de podiri nai ca sa Russia est fendu mali, ma creu e torru a nia ca is sportivus non c’intrant po nudda. Antzis is tennistas russus si funt postus inderetura contras sa guerra e po ddu fairi serbiat coragiu puru connoscendu comenti est sa “democratzia” de cussu logu. “Su sport depit sempiri mandai sinnalis bonus e fortisin in tantis maneras, ma chena ponni a un’ala is giogadoris”.
21 de arbili de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Torneo_di_Wimbledon
