In Sardigna ci funt prus o mancu centumila familias chi tenint dificultadi manna de speindiri, in d’unu mesi, prus de milli eurus po papai e pagai is bulletas. Funt sempiri de prus cussus chi tzocant sa janna de sa Caritas poita non ce dda faint a erribai a s’acabu de su mesi. Nd’at chistionau Arbertu Farina, segretariu regionali de sa Fnp (su sotziu nationali de is pensionaus) de sa Cisl in su cungressu chi funt fendu in su T Hotel de Casteddu. No est feti un’acusa, ma finas un’apellu chi sa Cisl bolit fairi erribai a sa Giunta Regionali.

“No est sa prima borta chi poneus chi pedeus de donai crobba a is problemas prus urgentis de is sardus. Boleus chi sa classi politiga sarda, massimamenti sa giunta regionali, facant calencuna cosa po agiudai is familias sardas. Mancat su trabagliu, sa genti est sempiri prus pobora e tenit problemas mannus po si curai, sa genti si nd’andat de is biddas ca mancat totu e su numuru de is feminas cun is giovunus chi non tenint cosa de fairi est sempiri prus artu. Finas chi eus aboginau cun sa Giunta regionali custa est abarrada tzega e surda”, is fueddus, in pagas errigas de su segretariu Farina.

Sanidadi, poberesa becia e noa, is partis socialis chi non benint cicadas po is scioberus indenanti de sa pesta: custus funt is temas de su Cungressu regionali, su de undixi” de sa Fnp Cisl Sardegna, chi bit sa presentzia finas de Gavino Carta, segretariu de sa Cisl Sardigna e Pieru Ragazzini, segretariu natzionali de sa Fnp Cisl.

“Sa situatzioni de sa sanidadi sarda est dificili meda, massimamenti po is scioberus chi fait sa Regioni chena pregontai nudda a nemus: fait e afateriat a sa sola, no est custa s’andala chi si depit sighiri – is fueddus de Carta –. Arregodaus ca custa giunta at fatu una campagna eletorali in pissu de sa riforma de sa Sanidadi, ma ancora no eus bidu nudda. Tocat a si moviri”.

 

 

13 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.facebook.com/fnpcislmilanometropoli/